काठमाडौं । सर्वोच्च अदालतको नयाँ भवनको अन्डरग्राउन्ड भागमा रहेको अभिलेख शाखामा बुधबार राति आगलागी भएको छ । आगलागीबाट अभिलेख शाखामा रहेका केही कागजात जलेका छन् ।
सर्वोच्च अदालतका अनुसार बुधबार राति करिब १२ बजे अभिलेख शाखामा आगो लागेको हो । आगलागीबाट सामान्य क्षति भएको र ठूलो क्षति नभएको अदालतले जनाएको छ ।
आगलागीबाट केही कानुनसम्बन्धी पत्रिका तथा मिसिलमा आवश्यक नभएका र नष्ट गर्नुपर्ने कागजात जलेका छन् । अधिकांश जलेका सामग्री काम नलाग्ने तथा सडाउनुपर्ने प्रकृतिका कागजात रहेको सर्वोच्चको भनाइ छ ।
आगलागी भएको जानकारी पाएलगत्तै दुई वटा दमकल बोलाएर आगो नियन्त्रणमा लिइएको थियो । आगलागीका कारण भवन तथा अभिलेखमा थप क्षति हुन नदिन तत्कालै नियन्त्रणको प्रयास गरिएको अदालतले जनाएको छ ।
अहिले आगलागीको कारण तथा भएको क्षतिको विस्तृत विवरण संकलन गर्ने काम भइरहेको सर्वोच्च अदालतले जनाएको छ ।
