धनकुटा । धनकुटा अस्पतालमा कार्यरत महिला स्वास्थ्यकर्मीमा कोरोना संक्रमण पुष्टि भएपछि आजबाट धनकुटा बजार क्षेत्र सिल गरिएको छ । आइतबार राती आकस्मिक रुपमा बसेको जिल्ला संकट व्यवस्थापन समितिको बैठकले धनकुटा अस्पतालसहित आसपासको बजार क्षेत्र सिल गरेर उच्च सर्तकता अपनाउने निर्णय गरेको हो । धनकुटाको सब्जीलाइन, बसपार्क, जिरोपोइन्ट, परिचयमोड, यलम्बर चौक, मधुगंगा सिनेमा हल र त्रिवेणी चौक क्षेत्र सिल गरिएको जिल्ला प्रशासन कार्यालयका सूचना अधिकारी जयराम श्रेष्ठले जानकारी दिए । सिल गरिएकोे क्षेत्रमा आवागनम पूर्ण रुपमा निषेध गर्न नेपाली सेनासहित सशस्त्र र नेपाल प्रहरी परिचालन गरिएको छ । धरान स्थित वीपी कोइराला स्वास्थ्य बिज्ञान प्रतिष्ठानमा आईतबार गरिएको परीक्षणका क्रममा धनकुटा अस्पतालमा कार्यरत ३४ बर्षीया नर्समा कोरोना संक्रमण भेटिएको हो ।
धनकुटामा पहिलो पटक कोरोना संक्रमण भेटिएसँगै बजारक्षेत्र सिल गरिएपछि अहिले सो क्षेत्र सुनसान बनेको छ । संक्रमण पुष्टि भएपछि जिल्ला अस्पतालको आईसोलेशनमा रहेकी नर्सलाई उपचारका लागि आजै बिराटनगरस्थित कोरोना बिशेष अस्पताल लग्ने तयारी गरिएको छ । त्यस्तै कोरोना संक्रमितको सम्पर्कमा पुगेकाहरुको पीसीआर परीक्षण गरिने भएको छ ।
संक्रमितको कन्ट्राक ट्रेसिङको काम पनि थालिएको छ । संक्रमित महिला लकडाउनको अवधिमा अन्यत्र नगएको र नियमित डिउटीमै रहेकाले अन्य संक्रमित बिरामीमार्फत उनमा कोरोना संक्रमण फैलिएको हुनसक्ने अनुमान गरेर धनकुटा बजार क्षेत्रमा थप सावधानी अपनाइएको छ । राजधानी दैनिक
