काठमाडौँ । प्रतिनिधि सभा सदस्य महेश बर्तौलाले स्वास्थ्य विमा कार्ड देखाएर नागरिकले देशका जुनसुकै सूचीकृत अस्पताल मार्फत विशेषज्ञ सेवा लिन पाईने व्यवस्था गर्नुपर्ने बताउनु भएको छ ।
सत्तापक्षको मुख्य सचेतक समेत रहनुभएका बर्तौलाले आज प्रतिनिधि सभा बैठकको शुन्य समयमा बोल्दै विशेषज्ञ सेवा लिनका लागि प्रथम सेवा विन्दुबाट रिफर ल्याउनुपर्ने व्यवस्था नागरिक मैत्री नभएको उल्लेख गर्नु भएको हो ।
उहाँले भन्नु भयो – “स्वास्थ्य विमा कार्यक्रम सरकारले ल्याएको एक महत्वपुर्ण सामाजिक स्वास्थ्य सुरक्षा कार्यक्रम हो । हाम्रो देशका ७५३ वटै पालिकाहरुमा यो कार्यक्रम विस्तार भएको छ । झण्डै ८० लाख नागरिकहरुको तहमा यो स्वास्थ्य विमा कार्यक्रम पुगेको छ ।”
उहाँले सभामुख मार्फत सरकारको ध्यानाकर्षण गराउँदै नागरिकले देशका जुनसुकै सूचीकृत अस्पताल मार्फत विशेषज्ञ सेवा लिन पाईने व्यवस्था गर्नुपर्नेमा जोड दिनुभयो ।
