काठमाडौं । चिनियाँ उपविदेशमन्त्री सहितको टोली राष्ट्रपति विद्यादेवी भण्डारीलाई भेट्न शितलनिवास पुगेको छ। नेपाल भ्रमणमा रहेको चिनियाँ कम्युनिष्ट पार्टीका अन्तर्राष्ट्रिय विभागका उपमन्त्री गुओ येचौ नेतृत्वको चार सदस्यीय टोली आज अपराह्न शीतल निवास प्रवेश गरेको हो ।
आज मात्र नेपाल आएको चिनियाँ टोलीले राष्ट्रपति विद्यादेवी भण्डारीसँग भेटवार्ता गर्नेछ । आइतबार दिउँसो एयर चाइनाको विमानमार्फत उनीहरु नेपाल आएका थिए । सो टोलीले नेपालमा राष्ट्रपति भण्डारीपछि प्रधानमन्त्री केपी शर्मा ओली, नेकपा प्रचण्ड–माधव समूहका अध्यक्षद्वय पुष्पकमल दाहाल प्रचण्ड र माधव नेपाल सहित अन्य राजनीतिक दलका नेताहरुसँग पनि भेटवार्ता गर्ने कार्यक्रम रहेको छ ।
हाल नेपालमा विकसित राजनीतिक घटनाक्रमपछि चिनियाँ टोली नेपालमा आएको छ र यसलाई विशेष महत्वका साथ हेरिएको छ । संसद विघटन गरेपछि प्रधानमन्त्री केपी ओली र राष्ट्रपति विद्यादेवी भण्डारीको आलोचना भएको छ । उता सोही कारणले नेकपामा विग्रह आएको छ । नेकपा दुई चिरामा विभाजन भएको छ र एक पक्षको नेतृत्व प्रधानमन्त्री ओलीले गरेका छन् भने अर्काे पक्षको पुष्पकमल दाहाल प्रचण्ड र माधव नेपालले गरिरहेका छन् ।
