काठमाडौँ । नेकपा(एमाले)का सांसद योगेश भट्टराईले प्रधानमन्त्री पुष्पकमल दाहालले विश्वासको मत पाउने बताउनुभएको छ ।
शुक्रवार नयाँ बानेश्वरस्थित संसद भवनमा सञ्चारकर्मीहरुसँग कुराकानी गर्दै सांसद भट्टराईले सत्ता समिकरण सुविधाजनक बहुमतमा भएको बताउनुभएको हो ।
उहाँले प्रधानमन्त्रीले जेठ ७ गते विश्वासको मत लिन प्रतिनिधि सभामा पत्राचार गर्नुभएको भन्दै प्रधानमन्त्रीले सुविधानजनक बहुमतका साथ विश्वासको मत पाउने बताउनु भयो । उहाँले सरकारले अध्यादेशमा बजेट ल्याउने नसोचेको भन्दै मुलुक अध्यादेशमा जान्छ जाँदैन भन्नेकुरा प्रमुख प्रतिपक्ष दल नेपाली काँग्रेसमा निर्भर भएको बताउनु भयो । उहाँले सरकारी समस्याको सन्दर्भमा कुनै खास व्यक्तिलाई केन्द्रित गरेर छानविन समिति बनाउन सत्तापक्ष सहमत नभएको स्पष्ट पार्नुभयो ।
उहाँले भन्नुभयो – ‘मलाई विश्वास छ कि आज र भोलिका सम्वादहरुले नेपाली काँग्रेसले आफ्नो हठ बाट पछाडी हट्ने छ । र हामी सत्तापक्षले पनि केही लचकताका साथ प्रश्तुत हुन्छौँ । हाम्रो भनाई त्यही छ, कुनैपनि समस्याको समाधान गर्न समितिहरु बन्न सक्छन् । छलफलहरु हुन सक्छ । सहकारीको विषयमा । अरु विषयमा । तर निश्चित व्यक्तिलाई केन्द्रीत गरेर समिति बन्ने कुरा त्यो संसदीय अभ्याससँग मिल्दोजुल्दो कुरा होइन । समग्र सहकारीको अध्ययन गर्न समिति बन्न सक्छ ।’
‘त्यसमा हामी लचक छौँ । तर व्यक्ति केन्द्रित भएर जसरी खास व्यक्तिमा केन्द्रित गर्ने भन्ने नेपाली काँग्रेसको कुरामा सहमत छैनौँ । हामी हुन सक्दैनौँ । ७ गते विश्वासको मत लिने एजेण्डा छ । अहिलेको राजनीतिक समिकरण, सत्ता समिकरणसँग संसदमा सुविधाजनक बहुमत छ । त्यो सुविधाजनक बहुमत ७ गतेपनि प्रकट हुन्छ । ७ गते पुन: प्रधानमन्त्रीमाथि विश्वासको मत छ भन्नेकुरा संसदले जायर गर्छ । अध्यादेशमा बजेट ल्याउने सोचेका छैनौँ । अध्यादेशमा मुलुक लान्छ लादैन भन्ने कुरा नेपाली कांग्रेसमा निर्भर छ ।’
सांसद भट्टराईले आईतवारसम्ममा नेपाली काँग्रेस आफ्नो हठबाट पछि हट्ने विश्वास व्यक्त गर्नुभयो ।
