काठमाडौं । सत्तारुढ दल नेकपा (एकीकृत समाजवादी) ले भारतसँग भएका पछिल्ला सम्झौताप्रति असन्तुष्टि जनाउँदै सरकारसँग सबै सम्झौताका दस्ताबेजहरु माग्ने भएको छ ।
सोमवार पार्टी केन्द्रिय कार्यालय आलोकनगरमा बसेको पार्टी सचिवालय बैठकले सो निर्णय गरेको हो । बैठकले भारतीय विदेशमन्त्री जयशंकर नेपाल आउँदा नेपाल—भारतको बीचमा भएका सम्झौताहरु सार्वजनिक गर्न माग गर्ने निर्णय गरेको पार्टी प्रवक्ता जगन्नाथ खतिवडाले बताउनु भयो ।
उहाँले विभिन्न देशसँग भएका नेपालको प्राकृतिक श्रोत, साधन, उर्जा, जलश्रोत लगायतका सम्झौताहरु माग गरी पार्टीले अध्ययन गर्ने निर्णय गरेको बताउनु भयो । उहाँले भारतसँग सरकारले गरेका पछिल्ला सम्झौताहरु संवेदनशील रहेको बताउनु भयो । बैठकले पार्टीका तर्फबाट सरकारमा गएका मन्त्रीहरुको कामको प्रगति विवरण पार्टीमा बुझाउन निर्देशन दिएको छ । पार्टीले राष्ट्रिय सभा निर्वाचनका लागि गठबन्धनबाट उम्मेदवार बनेकाहरुलाई जिताउन पार्टी पंक्तिलाई आग्रह गरेको छ ।
उहाँले भन्नुभयो, ‘आजको बैठकले हामीले केही दिनअघि राष्ट्रिय सभा निर्वाचनका लागि उम्मेदवार चयन गरेको छ । गठबन्धनको तर्फबाट त्यसलाई विजयी गराउन पार्टीका सबै कमिटीहरु, स्थानीय तहका मतदाता, प्रतिनिधि, पार्टी कमिटी सबैलाई एकजुट भइ लाग्न र उम्मेदवार जिताउन पार्टीले पुन: आह्वान गरेको छ । नेपाल र भारतको बीचमा भारतीय विदेशमन्त्री जयशंकर नेपाल आउँदा दुई देशहरुको बीचमा भएको केही सम्झौताहरु त्यो अहिले बजारमा चर्चामा रहेका छन् । यी र यस्ता सहमति धेरै देशसँग नेपालले गरेको छ । त्यो कुरालाई सार्वजनिक गर्न हाम्रो पार्टीको केन्द्रिय कमिटीको बैठकले प्रश्ताव गरेको थियो । त्यसलाई सँगै जोडेर पार्टीले यसबारेमा विभिन्न देशसँग भएका नेपालको प्राकृतिक श्रोत, साधन, उर्जा, जलश्रोत जे जस्ता चिजहरु छन् । त्यसको बारेमा गरिएका सदुपयोग गरिने शर्तहरु केके छन्, ती सबै डकुमेण्ट नेपाल सरकारसँग माग गर्ने र पार्टीमा अध्ययन गरी निस्कर्ष निकाल्ने निर्णय गरेका छौँ । किनभने विषयवस्तु संवेदनशील रुपमा बजारमा उठिरहेको छ । पार्टीले कर्तव्य सम्झिएको छ । सरकारमा हाम्रो पार्टीका तर्फबाट जानुभएका मन्त्रीहरुले आजसम्म गरेका कामहरु कस्ता छन्, प्रगति कस्तो छ ? यसको विवरणसहित तत्काल पार्टीलाई विवरण बुझाउन निर्देशन दिएको छ । आउँदो माघको ८ गते दिनको ११ बजे पार्टीको महाधिवेशनको सन्दर्भमा तयार गरिने र गरिएको मस्यौदा राजनीतिक प्रतिवेदनका सम्बन्धमा छलफल गर्न समितिको बैठक बोलाइएको छ ।’
बैठकले माघको ८ गते पार्टीको महाधिवेशनको सन्दर्भमा तयार गरिने र गरिएको मस्यौदा राजनीतिक प्रतिवेदनका सम्बन्धमा छलफल गर्न समितिको बैठक बोलाएको छ ।
