काठमाडौँ । अर्थमन्त्री प्रकाशशरण महतले मौद्रिक नीतिमा गरिएको परिवर्तनको घरजग्गा कारोबार र शेयर बजारमा सकारात्मक असर देखिएको बताएका छन् ।
बुधबार अर्थ मन्त्रालयमा आयोजित पत्रकार सम्मेलनमा बोल्दै अर्थमन्त्री महतले मौद्रिक नीतिमा गरिएको परिवर्तनले बैंक तथा वित्तीय क्षेत्रमा परेको सकारात्मक प्रभाव क्रमश: आर्थिक क्रियाकलापमा प्रतिबिम्बित भइरहेको बताएका हुन् ।
‘जग्गा कारोबार पनि बढ्ने क्रममा छ । उपभोक्तामा मानसिकता आत्मविश्वासको कमीको कुरा छ । उपभोक्ताहरूलाई उपभोग गरौँ कि नगरौँ भन्ने द्विधा छ, लगानीकर्ताहरूलाई लगानी गरौँ कि नगरौँ भन्ने द्विधा छ, त्यो पनि अन्त्य हुँदैछ । सबैतिरबाट आत्मविश्वास जगाउने कुरा गर्यौँ भने अर्थतन्त्रले निर्णायक मोड लिन्छ भन्ने यथेष्ट आधारहरू छन् ‘, उनले भने ।
अर्थमन्त्री महतले २०८० चैत्र सम्म समस्यामा परेका ऋणीहरुलाई कर्जाको पुनसंरचना गर्ने अवधि दिइएको बताए ।
