एजेन्सी । अन्तर्राष्ट्रिय क्रिकेट काउन्सिल (आईसीसी)ले यसै वर्षको अक्टोबर–नोभेम्बरमा भारतमा हुने एकदिवसीय विश्वकपका लागि विभिन्न स्थानका क्युरेटरका लागि ‘प्रोटोकल’ तयार गरेको छ ।
आईसीसीले क्युरेटरहरूलाई पिचहरूमा थप घाँस राख्न आग्रह गरेको छ । अक्टोबर–नोभेम्बरमा, भारतका धेरै भागहरूमा शीत लाग्छ, जसका कारण टसको भूमिका महत्त्वपूर्ण हुन्छ । आईसीसीले टसको भूमिकालाई केही हदसम्म कम गर्न यो कदम चालेको हो ।
टाइम्स अफ इन्डियाको समाचारका अनुसार भारतीय पिचहरू सामान्यतया स्पिनका लागि बढी अनुकूल हुन्छन्, तर आईसीसीले क्युरेटरहरूलाई पिचहरूमा बढी घाँस राख्न आग्रह गरेको छ, ताकि फास्ट बलरहरूलाई पनि खेलमा सहयोग मिलोस् । यसको मतलब टोलीले प्लेइङ–११ मा थप पेसरलाई अवसर दिन सक्छ ।
२०२१ मा युएईमा सम्पन्न टी–२० विश्वकप पनि शीतले निकै प्रभावित भएको थियो र दोस्रो ब्याटिङ गर्ने टोलीलाई धेरै फाइदा भएको थियो ।
एक स्रोतले टाइम्स अफ इन्डियालाई भन्यो, ‘उत्तर, पश्चिम र पूर्वी राज्यहरूले वर्षको यस समयमा भारी शीत देख्नेछन् । चेन्नई र बैंगलोरमा हुने खेलमा वर्षाको सम्भावना छ । स्पिनरहरूको प्रदर्शनमा ओसले ठूलो प्रभाव पार्छ । त्यसैले धेरै घाँसको साथ, टोलीहरूले स्पिनरहरूमा धेरै भर पर्नु पर्दैन ।’
बलबीच सन्तुलन कायम राख्न आईसीसीले प्रत्येक फिल्डको बाउन्ड्री ठूलो गर्न निर्देशन दिएको छ । सबै रंगशालाका क्युरेटरलाई बाउन्ड्रीको साइज ७० मिटर हुनुपर्ने बताईएको छ ।
अन्तर्राष्ट्रिय खेलहरूमा बाउन्ड्रीको न्यूनतम साइज ६५ मिटर र अधिकतम साइज ८५ मिटर हुन्छ । पुराना रंगशालामा बाउन्ड्री साइज ७० देखि ७५ मिटर हुने भए पनि अब बाउन्ड्री साइज ७० मिटरभन्दा बढी हुनुपर्नेछ ।
विश्वकप २०२३ का खेल १० सहरमा खेलाइनेछ । जसमा अहमदाबाद (नरेन्द्र मोदी स्टेडियम), बैंगलोर (एम चिन्नास्वामी स्टेडियम), चेन्नई (एमए चिदम्बरम स्टेडियम), दिल्ली (अरुण जेटली क्रिकेट स्टेडियम), धर्मशाला (हिमाचल प्रदेश क्रिकेट एसोसिएशन स्टेडियम), हैदराबाद (राजीव गान्धी अन्तर्राष्ट्रिय क्रिकेट स्टेडियम, उप्पल) छन् ।
