काठमाडौँ। रुसको नोवोरोसिस्क बन्दरगाह नजिकै काला सागर (ब्ल्याक सी) मा टर्कीको एक व्यापारिक जहाजमाथि आक्रमण भएको छ ।
उक्त घटनामा परी एक जना नाविकको मृत्यु भएको छ भने अन्य आठ जना घाइते भएका छन् । स्थानीय सञ्चारमाध्यमका अनुसार ‘काल्योन्कु डेनिसिलिक’ कम्पनीद्वारा सञ्चालित ‘युरल’ नामक जहाजमाथि मध्यरातमा उक्त आक्रमण भएको हो ।
आक्रमणका बावजुद जहाजले आफ्नो यात्रा जारी राखेको र शनिवार टर्कीको उत्तरी बन्दरगाह सामसुन पुगेको ‘इहलास न्युज एजेन्सी’ले जनाएको छ ।
यसअघि, ‘युरल’ जहाजले टर्कीकै अर्को मालवाहक जहाज ’नेसिबे’का १८ जना चालक दलका सदस्यहरूलाई उद्धार गरेको थियो । नेसिबेमाथि पनि काला सागरमै आक्रमण भएको बताइएको थियो ।
काला सागर क्षेत्रमा पछिल्लो समय व्यापारिक जहाजहरूमाथि श्रृङ्खलावद्ध आक्रमणका घटनाहरू भइरहेका छन्। यो घटनालाई सोही असुरक्षित वातावरणको पछिल्लो कडीका रूपमा हेरिएको छ । सिन्ह्वा/न्युज एजेन्सी नेपाल
