काठमाडौँ । काठमाडौँ महानगरपालिकाले माइक्रोमिटरबाट प्लाष्टिक सामानको मोटाइ अनुगमन गर्ने भएको छ । काठमाडौँका मेयर बालेन शाहले यसरी अनुगमन गरिने बताएका हुन् ।
‘यसको कार्यान्वयनका लागि हामीले वातावरण व्यवस्थापन विभाग र नगर प्रहरी बलको संयुक्त अनुगमन टोली परिचालन गर्दैछौँ । प्रहरीको क्षेत्रबाट ४ टोली र केन्द्रबाट एउटा टोली गरी ५ वटा टोली यसका लागि खटाइनेछ । टोलीले माइक्रोमिटरबाट प्रयोगमा रहेका प्लाष्टिकको जाँच गर्छ ।’ उनले भनेका छन् ।
यदि पोलिथिन ४० माइक्रोनभन्दा कम मोटाइका भए जफत गर्ने मेयर शाहले बताएका छन् । प्लाष्टिकका फूल, प्लाष्टिकका सजावटका सामानचाहिँ कुनै पनि प्रयोग गर्न नपाइने मेयर शाहले प्रस्ट पारेका छन् ।
अनुगमनमा आउनु र जफत गर्नुअघि आयात, भण्डारण र विक्री गर्ने व्यक्ति तथा व्यापारिक संघ संस्थाले निषेधित कार्य नगर्न नगराउन मेयर शाहले अनुरोध समेत गरेका छन् ।
