काठमाडौं । प्रतिनिधिसभा कार्यव्यवस्था परामर्श समितिको बैठकले प्रतिनिधिसभाको आजको बैठकमा मिटरब्याजसम्बन्धी विधेयक आजै पास गर्ने कार्यसूची तय गरेको छ ।
प्रतिनिधिसाको बैठक अगाडि संसद भवन नयाँ वानेश्वरमा बसेको कार्यव्यवस्था परामर्श समितिको बैठकले तय गरेको कार्यसूचीअनुसार कानून, न्याय तथा संसदीय मामिलामन्त्री धनराज गुरुङले राष्ट्रियसभामा उत्पति भएको ‘मुलुकी संहिता सम्बन्धी केही नेपाल ऐनलाई संशोधन गर्न बनेको विधेयक २०८० माथिको दफावार छलफल सदनमा गरियोस्’ भन्ने प्रस्ताव प्रस्तुत गर्नु हुनेछ ।
उक्त विधेयकको दफावार छलफलपछि विधेयकमाथि परेका संशोधनहरुलाई निर्णयार्थ प्रस्तुत गरिने र त्यसपछि मन्त्री गुरुङले विधेयक पारित गरियोस् भनी प्रस्ताव प्रस्तुत गर्नेछन् ।
मन्त्री गुरुङले यही असार ५ गते राष्ट्रियसभामा उक्त विधेयक दर्ता गराउनुभएको थियो । राष्ट्रियसभाले असार १५ गते दफावार छलफल गरी सोही दिन पारित गरेर प्रतिनिधिसभामा पठाएको थियो ।
