काठमाडौं। सभामुख डीपी अर्यालले रसुवामा गएको विनाशकारी बाढीबाट प्रभावित क्षेत्रको पछिल्लो अवस्था, बाढीबाट भएको जनधनको क्षति तथा संघीय संसद् र संसद् सचिवालयका कामकारबाहीमा पर्न सक्ने प्रभावबारे सचिवालयका पदाधिकारीसँग छलफल गर्नुभएको छ।
सभामुख अर्यालले संघीय संसद्का महासचिव, प्रतिनिधि सभाका सचिव, राष्ट्रिय सभाका सचिव तथा सचिवालयका सम्बन्धित पदाधिकारीसँग छलफल गर्नुभएको हो।
छलफलका क्रममा सभामुख अर्यालले विपद्को यस घडीमा संसद् सचिवालयबाट गर्न सकिने सहयोग, आवश्यक समन्वय तथा प्रभावित क्षेत्रमा सहजीकरणका लागि सचिवालयलाई तयारी अवस्थामा रहन निर्देशन दिनुभएको छ।
उहाँले विपद्बाट प्रभावित नागरिकलाई आवश्यक सहयोग पुर्याउन उपलब्ध स्रोतसाधनको प्रभावकारी परिचालन तथा सम्बन्धित निकायसँग आवश्यक समन्वय गर्न पनि जोड दिनुभएको छ।
रसुवालगायतका प्रभावित क्षेत्रमा बाढीका कारण ठूलो जनधनको क्षति भएपछि राज्यका विभिन्न निकाय उद्धार, राहत तथा पुनःस्थापनामा केन्द्रित भएका छन्। यस्तो अवस्थामा संघीय संसद् र संसद् सचिवालयको भूमिका तथा आगामी कामकारबाहीलाई प्रभावकारी बनाउने विषयमा समेत छलफल भएको जनाइएको छ।
