काठमाडौं । रसुवाको भोटेकोशी नदीमा पुनः बाढीको जोखिम देखिएपछि राष्ट्रिय विपद् जोखिम न्यूनीकरण तथा व्यवस्थापन प्राधिकरणले उच्च सतर्कता अपनाउन आग्रह गरेको छ।
प्राधिकरणका अनुसार यही भदौ १० गते आएको भीषण बाढीपछि भोटेकोशी क्षेत्रमा शुक्रबार पुनः लेदोसहित पानीको बहाव केही बढेको सूचना प्राप्त भएको छ। यससँगै थप बाढी आउन सक्ने जोखिम रहेको प्राधिकरणले जनाएको छ।
भोटेकोशी तथा त्रिशूली नदी किनारमा रहेका नागरिक, उद्धार तथा राहत कार्यमा खटिएका सुरक्षाकर्मी र स्वयंसेवकसहित जोखिम क्षेत्रमा रहेका सबैलाई सतर्क रहन प्राधिकरणले अनुरोध गरेको छ।
सम्भावित जोखिमलाई मध्यनजर गर्दै नदीको बहावमा आउने परिवर्तनलाई गम्भीरतापूर्वक लिन र जोखिमयुक्त क्षेत्रमा अनावश्यक रूपमा नबस्न प्राधिकरणले आग्रह गरेको छ।
अवस्था थप जोखिमपूर्ण देखिएमा तत्काल सुरक्षित स्थानमा जानसमेत प्राधिकरणले विशेष अनुरोध गरेको छ।
प्राधिकरणका प्रवक्ता तथा उपसचिव शान्ति महतले शुक्रबार जारी गरेको सूचनामार्फत भोटेकोशी र त्रिशूली नदी आसपासका क्षेत्रमा उच्च सतर्कता अपनाउन आग्रह गरेकी हुन्।
