एजेन्सी । शनिबार राति उत्तर प्रदेशको प्रयागराजमा माफिया अतिक अहमद र उनका भाइ असरफको हत्या भएको छ । प्रहरीले दुवैलाई स्वास्थ्य परीक्षणका लागि अस्पताल लैजाँदै थियो । छेउछाउमा हिँड्दै गरेका पत्रकारहरुले अतिक र असरफलाई प्रश्न गरिरहेका थिए ।
यसैबीच तीन आक्रमणकारीले प्रहरीको सुरक्षा घेरा तोडेर अतिकको टाउकोमा गोली हानेको भारतीय सञ्चारमाध्यमले जनाएको छ । यसपछि अशरफमाथि गोली प्रहार भएको थियो । दुवैले घटनास्थलमै ज्यान गुमाए ।
आक्रमणकारी पत्रकार बनेर आएका थिए । उनीहरुको नाम लवलेश तिवारी, सन्नी र अरुण मौर्य रहेको छ । आक्रमणपछि तीनै जनाले आत्मसमर्पण गरेका थिए । लवलेश बांदा, अरुण हमीरपुर र सन्नी कासगञ्जका बासिन्दा हुन् ।
तीनै जनालाई प्रहरी हिरासतमा राखेर सोधपुछ भइरहेको छ । उनीहरुको साथबाट हतियार समेत बरामद भएको छ । यस आक्रमणमा प्रहरी जवान मानसिंहलाई पनि गोली लागेको छ, उनलाई अस्पताल लगिएको छ ।
अतिकको मृत्युको खबर सुनेपछि प्रयागराज जेलमा रहेका अतिकका दोस्रो छोरा अली बेहोस भए । अतिकका दुई नाबालिग छोरा राजरूपपुर बाल सुधार गृहमा छन् । त्यहाँको टिभी केबल कनेक्शन काटिएको बताइएको छ ।
गत चैत १४ गते अतिकलाई प्रयागराजको सांसद–विधायक अदालतले आजीवन कारावासको सजाय सुनाएको थियो । १७ वर्ष पूरानो उमेश पाल अपहरण मुद्दामा यो सजाय सुनाइएको हो । प्रहरी अभिलेखमा अतिक गिरोहविरुद्ध १ सय १ मुद्दा थिए । अतिकलाई दोषी ठहर गरेको यो पहिलो मुद्दा थियो ।
