काठमाडौं । नेपाल उद्योग वाणिज्य महासंघका नवनिर्वाचित पदाधिकारीहरुले आज पदबहाली गरेका छन् ।
महासंघको अध्यक्षमा पदबहाली ग्रहण गर्दै चन्द्रप्रसाद ढकालले प्रमुख ५ काम गर्ने प्रतिवद्धता गरेका छन् । अध्यक्ष ढकालले पहिलो काममा वर्तमान आर्थिक संकट समाधानको रणनीति तयार गर्ने, दोस्रोमा लगानीको वातावरण बनाउने र तेस्रोमा राज्य र निजी क्षेत्रबीचको साझेदारी सुदृढ गर्ने बताएका छन् ।
यस्तै उनले चौथो काममा दक्ष जनशक्ति उत्पादन र रोजगारी सृजना गर्न प्रथामिकता दिएका छन् । उनले पाँचौं काममा व्यवसायीहरुको मनोबल उच्च बनाउन राज्यको मर्यादाक्रममा निजी क्षेत्रको स्थान निर्धारण गर्ने बताएका छन् ।
‘गाँउबाट आएको सानो व्यवसायी पनि महासंघको नेतृत्वमा आउन सक्दो रहेछ । त्यसको उदारण म आफै हो । म आफै पनि सानो व्यवसाय गरेर महासंघको नेतृत्वमा आएको छु । साना व्यवसायी र सबै खालका व्यवसायीको प्रतिनिधित्व हुन्छ ।’, पदभार ग्रहण गर्दै ढकालले भने, ‘मैले ५ बुँदे प्रतिवतदा पनि घोषण गरेको छु । सरकारले पनि ती काम गर्न सहयोग गर्ने विश्वास लिएको छु ।’
महासंघका निवार्तमान अध्यक्ष शेखर गोल्छाले अध्यक्ष ढकालले सार्वजनिक गरेका ५ प्रतिवद्धतामा साथ रहने बताए । उनले ढकालको नेतृत्वको टिम महासंघमा सफल हुने विश्वास व्यक्त गरे ।
