फ्रान्समा अहिले कान्स फिल्म फेस्टिभल जारी छ । यो फेस्टिभल यही मे २८ तारिखसम्म चल्नेछ ।
फेस्टिभलमा विश्वभरिका फिल्म सेलिब्रेटीको जमघट हुने गर्दछ । यहाँ फिल्मको प्रिमियर सो हुनेछ भने रेड कार्पेटमा वाक गरेर विश्वभरका सेलिब्रेटी दैनिक चर्चा रहने गर्छन् ।
नेपाली फिल्म अभिनेत्री सुरक्षा पन्त पनि एउटा विदेशी फिल्मको प्रिमियरका लागि अहिले कान्स फेस्टिभलमा पुगेकी छन् । त्यहाँ उनले रेड कार्पेटमा रातै पहिरनमा वाकसमेत गरिसकेकी छन् ।
त्यसैले कान्स फिल्म फेस्टिभल विश्वभरका फिल्म सेलिब्रेटीहरुको आकर्षणको केन्द्र पनि हो । तर यसपटक यहाँ फेस्टिभलमा अर्कै समाचारले पनि चर्चा पाएको छ ।
कान्समा एक महिला रेड कार्पेटमा आएर चिच्याउन थालिन् । उनी टपलेस भएर आफ्नो शरीरमा युक्रेनको झण्डाको रङले पोतेकी ती महिलाले चिच्याउँदै भनिन्, “हामीलाई बलात्कार गर्न बन्द गर ।”
अहिले रुस र युक्रेनबीच युद्ध भइरहेको छ । रुसी सैनिकले युक्रेन महिलामाथि बलात्कार गरेको घटना सार्वजनिक भइरहेको सन्दर्भमा उनले कान्सको रेड कार्पेटमा टपलेस भएर सार्वजनिक रुपमा विरोध गरिन् । उनी युक्रेनको महिला अभियानकर्मी रहेको बताइएको छ ।
उनलाई तत्काल सुरक्षाकर्मीले कालो ज्याकेटले ढाकिदिए र आफूसँगै लिएर गए । सो बखत अन्य सेलिब्रेटीहरुले गरिरहेको वाक केहीबेर रोकिएको थियो ।
