पोखरा । नेपाली कांग्रेसका सभापति शेरबहादुर देउवाले नेकपा (एमाले) का अध्यक्ष केपी शर्मा ओली प्रजातन्त्र र गणतन्त्रको खिलापमा रहेको बताउनुभएको छ ।
आइतबार पोखरामा आयोजित चुनावी सभामा उहाँले ओलीले नेतृत्व गरेको पार्टीसमेत प्रजातन्त्र र गणतन्त्रका विरुद्धमा रहेको उल्लेख गर्दै भन्नुभयो, “मुलुकमा स्थायित्व र स्थिरताका लागि पनि पाँच दलीय गठबन्धनलाई जिताउनुपर्छ ।”
ओलीले जित भोलि नै संसद् भंग गरिदिनसक्ने उहाँको भनाइ थियो । उहाँले नेपाली कांग्रेसलाई पाँच दलीय गठबन्धन सबैभन्दा धेरै आवश्यक भएको बताउनुभयो । गठबन्धन बनेपछि नै पोखरामा अवस्था फेरिएको उहाँको भनाइ थियो ।
ओलीले संसद् भंग गरेपछि नै गठबन्धन गरेको जिकिर गर्दै सभापति देउवाले अरु दल उदार भएकाले कांग्रेस सरकारको नेतृत्वमा आएका बताउनुभयो । उहाँले भन्नुभयो, “त्यसैले गठबन्धनलाई सफल पार्नु हाम्रो कर्तव्य हो ।”
