एजेन्सी । आईपीएल २०२२ को ३७ औँ खेलमा लखनउ सुपर जायन्ट्सले मुम्बई इन्डियन्सलाई ३६ रनले पराजित गरेको छ । मुम्बईको वानखेडे स्टेडियममा भएको खेलमा लखनउले १ सय ६८ रनको सफलताको रक्षा गरेको थियो ।
लखनउका बलरहरूले मुम्बईका ब्याट्सम्यानलाई १३२ रनको स्कोरमा रोकेर खेल जिताए । लखनउ यो सिजनमा यो पाँचौं जित निकाल्दै अंक तालिकाको चौंथो स्थानमा उक्लिएको छ । अर्कोतर्फ मुम्बईको टोली लगातार आठ खेलमा हार बेहोरेर प्लेअफको दौडबाट झण्डै बाहिरिएको छ ।
लखनउले दिएको १६९ रनको लक्ष्य पछ्याएको मुम्बई इन्डियन्सले राम्रो सुरुवात गर्दै पहिलो पावरप्लेमा कुनै विकेट नगुमाई ४३ रन बनाएको थियो । यसपछि इशान किशनको ब्याट फेरि चल्न सकेन । उनी आठौं ओभरमा २० बलमा आठ रन बनाएर आउट भए । यस पटक पनि डेवाल्ड ब्रेभिस असफल भए । उनी अर्को ओभरमा तीन रन बनाएर आउट भए । क्रुणाल पाण्ड्याले रोहित शर्मालाई ३९ रनमा पेभिलियन पठाए । सूर्यकुमार यादव पनि छिट्टै पेभिलियन फर्किए । उनलाई बडोनीले ७ रनमा आउट गरे ।
१८ रनमा शीर्ष चार विकेट गुमाएको मुम्बईको टोली समस्यामा परेको थियो । तर, तिलक वर्माले केरोन पोलार्डसँग पाँचौं विकेटका लागि ५७ रनको साझेदारी गरे । यद्यपि, त्यो पनि पर्याप्त भएन । तिलक १८ औं ओभरमा ३८ रन बनाएर आउट भए । अन्तिम ओभरमा मुम्बईलाई जितका लागि ३९ रन चाहिएको थियो र क्रुणाल पाण्ड्याले दुई विकेट लिएर खेल लखनउको पोल्टामा पुर्याए ।
यसअघि मुम्बईले टस जितेर पहिले बलिङ गर्ने निर्णय गरेको थियो । लखनउको सुरुवात राम्रो हुन सकेन । २७ रनको स्कोरमा उसलाई पहिलो झट्का लाग्यो । क्विन्टन डी कक १० रन बनाएर आउट भए । केएल राहुल र मनिष पाण्डेले इनिङलाई सम्हाले र दोस्रो विकेटका लागि ५८ रनको साझेदारी गरे । तर, मनिष २२ रन बनाएर आउट भए । त्यसपछि मार्कस स्टोइनिस र क्रुणाल पाण्ड्या पनि सस्तोमा पेभिलियन फर्किए ।
लखनउ एक समयमा १०३ रनमा चार विकेट गुमाएर समस्यामा परेको थियो । तर, राहुलले रन बनाएर टोलीको स्कोरलाई अगाडि बढाउने काम जारी राखे । यस अवधिमा उनले आफ्नो शतक पूरा गरे र टोलीको स्कोर १६८ मा पुर्याए । राहुलले ६२ बलमा १०३ रन बनाएर अविजित रहे । यो सिजनको उनको दोस्रो शतक थियो र दुवै शतक उनले मुम्बईविरुद्ध बनाए ।
आजको खेलः पञ्जाब किंग्सविरुद्ध चेन्नई सुपर किंग्स – ७ः४५ बजे
