एजेन्सी । आईपीएलको २७ औं खेलमा रोयल च्यालेन्जर्स बैंग्लोरले १६ रनको शानदार जित दर्ता गरेको छ । दिल्ली क्यापिटल्सविरुद्धको खेलमा आरसीबीले १८९ रनको रक्षा गर्दै सिजनको चौथो जित हात पारेको हो ।
मुम्बईको वानखेडे स्टेडियममा भएको खेलमा दुई टोलीबीच रोमाञ्चक खेल भएको थियो । उतारचढावले भरिएको खेलमा बैंग्लोरको टोलीले जित निकालेको हो । फाफ डु प्लेसिसको नेतृत्वमा रहेको आरसीबी यो जितसँगै अंक तालिकाको तेस्रो स्थानमा उक्लिएको छ । बैंगलोरका लागि दिनेश कार्तिकले अविजित ६६ रनको इनिङ्स खेले भने म्याक्सवेलले ५५ रन बनाए । यस्तै, जो हेजलवुडले बलिङमा सबैभन्दा बढी तीन विकेट लिए ।
रोयल च्यालेन्जर्स बैंग्लोरले दिएको १९० रनको लक्ष्यको जवाफमा दिल्लीले राम्रो सुरुवात गरेको थियो । पृथ्वी शा र डेभिड वार्नरले २७ बलमा ५० रनको साझेदारी गरे । पृथ्वी शाले १३ बलमा १६ रन बनाउँदै सिराजको बलमा अनुज रावतको हातबाट क्याच आउट भए । त्यसपछि वार्नरले सानदार रन बनाए र २९ बलमा आफ्नो अर्धशतक पूरा गरे । त्यसपछि हसरंगाको बलमा ३८ बलमा ६६ रन बनाएर उनी एलबीडब्ल्यू आउट भए ।
वार्नर आउट भएपछि दिल्लीको विकेट झर्न थाल्यो र २१ रनमा दिल्लीले चार विकेट गुमायो । जोस ह्याजलवुडले ललित र पावेललाई सोही ओभरमा आउट गरेका थिए । कप्तान ऋषभ पन्त र शार्दुल ठाकुरले रन बनाउने प्रयास गरे र बलियो साझेदारी बनाउन थाले तर विराटले पन्तलाई एक हातमा समातेर बैंग्लोरलाई खेलमा फर्काए । यसपछि ब्याटिङ गरेको दिल्लीको टोलीले २० ओभरमा ७ विकेट गुमाएर १७३ रन मात्रै बनाउन सकेको थियो ।
मुम्बईको वानखेडे स्टेडियममा भएको खेलमा टस हारेर पहिले ब्याटिङ रोजेको बैंग्लोरको सुरुवात राम्रो हुन सकेन । उसले तेस्रो ओभरमा १३ रनको स्कोरमा आफ्ना ओपनरहरूको विकेट गुमायो । फाफ डु प्लेसिस आठ र अनुज रावत खाता नखोलेर पभिलियन फर्किए । यसपछि विराट र ग्लेन म्याक्सवेलले इनिङ्सलाई एकसाथ सम्हाल्ने प्रयास गरे तर ललित यादवको सटीक थ्रोमा कोहली १२ रनमा रनआउट भए। तर, यसपछि म्याक्सवेलले खेल सम्हाल्दै ३२ बलमा आफ्नो अर्धशतक पूरा गरे । कुलदीपले म्याक्सवेललाई ५५ रन बनाएर आउट पारे ।
आरसीबीले १२ औं ओभरमा ९२ रनमा पाँच विकेट गुमाएको थियो र समस्यामा परेको थियो । तर दिनेश कार्तिक र शाहबाजले छैटौं विकेटका लागि ९७ रनको अटूट र बलियो साझेदारी गर्दै टोलीको स्कोर १८९ रनमा पुर्याएका थिए । कार्तिक ३४ बलमा ६६ रनमा अविजित रहे भने शाहबाजले २१ बलमा ३२ रन बनाए । दिल्लीका शार्दुल(अक्षर(खलिल र कुलदीपले समान एक–एक विकेट लिए ।
