काठमाडौं । पहिलो एकदिवसीय अन्तराष्ट्रिय क्रिकेट अन्तर्गत पपुवा न्युगिनी (पीएनजी)ले नेपाललाई पराजित गरेको छ ।
शुक्रबार कीर्तिपुरको त्रिवि क्रिकेट मैदानमा भएको खेलमा पाहुना टोली पीएनजीले नेपाललाई ६ रनले हराएको हो ।
२९३ रनको लक्ष्य पछ्याएको नेपालले ५० ओभरमा ८ विकेटको क्षतिमा २८६ रन जोड्यो । नेपालले एक दिवसीय क्रिकेटमा बनाएको यो अहिलेसम्मकै उच्च स्कोर रहेको छ ।
नेपालका लागि ओपनर कुशल भुर्तेलले २८ बलमा ३२, अनिल शाहले २१ बलमा ६, देव खनाल ६ बलमा शून्य रन, दिपेन्द्र सिंह ऐरीले १७ बलमा १५, रोहित पौडेलले १०७ बलमा १२६, आरिफ शेखले ६४ बलमा ३४, भिम सार्कीले १८ बलमा १७, पवन शर्राफले १० बलमा ७ रन जोडे । यस्तै सोमपाल कामी १६ बलमा १८ तथा कमल ऐरी १५ बलमा १८ रनमा अविजित रहे ।
पीएनजीका लागि नोर्मन भनुआले ३ विकेट लिए । यस्तै अशद भाला र चाल्र्स अमिनीले २–२ विकेट लिए भने नोसाइना पोकानाको नाममा एक विकेट रह्यो ।
त्यसअघि टस हारेर ब्याटिङ थालेको पीएनजीले ५० ओभरमा ८ विकेटको क्षतिमा २९२ रन जोड्यो । नेपालविरुद्ध कुनै राष्ट्रले एकदिवसीय अन्तराष्ट्रिय क्रिकेटमा बनाएको यो नै सर्वाधिक रन समेत हो ।
पीएनजीका दुई खेलाडीले अर्धशतक पुरा गरे । चार्ल्स अमिनीले सर्वाधिक ७७ रन जोडे । उनले १ सय ३ बलमा ६ चौका र १ छक्का प्रहार गरे ।
यस्तै, कप्तान असद भालाले ५५ बलमा ११ चौका प्रहार गर्दै ६० रनको अर्धशतकीय इनिङ खेले । यस्तै ओपनर टोनी उराले ४७ बलमा ३८ रन बनाउँदा रिले हेकुरे ४० बल खेल्दै ३१ रनमा आउट भए । नोरमान भनुआले २८ बलमा ४७ रन बनाए । उनले ४ चौका र ३ छक्का प्रहार गरे । यस्तै, जासन किला ११ बल खेल्दै १३ रनमा अविजित रहे ।
नेपालका लागि कमल ऐरी, सोमपल कामी, दिपेन्द्र सिंह ऐरीले समान २–२ विकेट लिए । सन्दीप लामिछाने र आरिफ शेखले १–१ विकेट लिए ।
यसैबीच, मध्यक्रमका युवा ब्याटर रोहितकुमार पौडेलले एकदिवसीय अन्तर्राष्ट्रियमा नेपालका लागि एकैदिन तीन कीर्तिमान बनाए ।
रोहितले एकदिवसीय अन्तर्राष्ट्रियमा सर्वाधिक रनको साझेदारी, एकै इनिङमा सर्वाधिक रन र एकदिवसीय अन्तर्राष्ट्रियमा सर्वाधिक रनको कीर्तिमान बनाएका हुन् ।
