काठमाडौं । भारत र अस्ट्रेलियाबीचकाे दोस्रो टेष्ट क्रिकेट खेलमा अस्ट्रेलिया १४६ रनले बिजयी भएकाे छ । दुइ सय ८७ रनको चुनौती पछ्याउँदै ब्याटिङ गरेको भारतले चौथो दिनको समाप्तिसम्म पाँच विकेट गुमाएको थियाे । याे जितसँगै चार खेलकाे यस सिरिज १-१ काे बराबरमा अाएकाे छ । अब २६ डिसेम्बरमा मेलबर्नमा तेस्राे टेस्ट हुनेछ जसलाइ बक्सिङ डे टेस्ट पनि भनिन्छ ।
तर पाँचाैं दिनकाे खेल शुरू भएकाे केही समयभित्रै भारतकाे पूरै पाली १४० रनमा समेटियाे ।
भारतका तर्फबाट लोकेश राहुललाई शुन्य रनमै गुमाएको भारतले १३ रन हुँदा दोस्रो विकेटको रुपमा चेतेश्वर पुजरालाई चार रनमा गुमाएको थियो । भारतका लागि अजिंक्या राहानेले ३० रन बनाएर आउट हुँदा मुरली विजय २० रनमा आउट भए भने कप्तान विराट कोहली पनि १७ रनमै क्याच आउट हुन पुगे ।
यसअघि अष्ट्रेलियाले आफ्नो दोस्रो इनिङ्स सबै विकेटको क्षतिमा २४३ रन बनाएपछि भारतले २८७ रनको लक्ष्य पाएको थियो । उस्मन ख्वाजा ७२ रन बनाउँदै अष्ट्रेलियालाई राहत दिएका थिए । बलिङतर्फ भारतका मोहम्मद सामीले ६ विकेट लिए ।
पर्थ स्टेडियममा टस जितेर ब्याटिङ गरेको अष्ट्रेलियाले पहिलो इनिङमा सबै विकेटको क्षतिम ३२६ रन बनाएको थियो ।
यता, भारतले भने आफ्नो पहिलो इनिङ्समा सबै विकेटको क्षतिमा २८३ रन मात्रै बनाएको थियो । भारतका लागि कप्तान विराट कोहलीले १२३ रन बनाउँदै उकासेका थिए ।
