![](https://newspolar.com/wp-content/uploads/2022/03/94925366_1310845455776772_2074806809872302080_n.jpg)
![](https://newspolar.com/wp-content/uploads/2018/12/teacher-recruitment.jpeg)
काठमाडौं । शिक्षा, विज्ञान तथा प्रविधि मन्त्रालयले करिब २७ हजार अस्थायी शिक्षकलाई अवकाश दिन करिब १० अर्ब रुपैयाँ माग गरेको छ। शिक्षक सेवा आयोगको परीक्षामा एकपटक अवसर दिइएका तीन तहका शिक्षकमध्ये अनुत्तीर्ण भएका शिक्षकलाई सुविधासहित विदा दिने व्यवस्था गर्न उक्त रकम माग गरिएको हो।
शिक्षा तथा मानव स्रोत केन्द्रले अवकाश पाउने शिक्षकको संख्यासहित बजेट माग गरेको थियो। तथ्याङ्कअनुसार सबैभन्दा बढी प्राथमिक तहका शिक्षकले सुविधासहित अवकाश पाउने भएका छन्। पाथमिक तहका २० हजार चार सय ७५ शिक्षकले अवकाश पाउन लागेका हुन्।
केन्द्रले सुविधाका लागि र शिक्षक सेवा आयोगको परीक्षामा असफल भएका शिक्षकको तथ्यांक संकलन गरेको छ। प्राथमिक तहमा सुविधाका लागि आवेदन दिने शिक्षकको संख्या आठ हजार छ सय ४० रहेको छ।
आयोगको परीक्षामा असफल हुनेको संख्या ११ हजार आठ सय ३५ छ। मावि तहमा सुविधाका लागि आवेदन दिने शिक्षकको संख्या एक हजार दुई सय ५९ र परीक्षामा असफल हुने अस्थायी शिक्षकको संख्या एक हजार नौ सय ६० गरी तीन हजार दुई सय १९ मावि शिक्षकले सुविधासहित विदा पाउने छन्। नेपाल समाचारपत्र दैनिकमा समाचार छ ।