फ्राइडे रिलजअन्तर्गत आजबाट दुई नेपाली चलचित्र प्रदर्शनमा आएका छन् । शुक्रवार नेपाली सिनेमा हलमा चलचित्र ‘कागजपत्र’ र ‘प्रेमलीला’ प्रदर्शन भएका हुन् ।
कमेडी र सोसल ड्रामा जनरामा आधारित रहेको चलचित्र ‘कागजपत्र’मा नाजीर हुसेन र शिल्पा मास्के प्रमुख भूमिकामा रहेका छन् । चलचित्रलाई अपिल विष्टले निर्देशन गरेका हुन् ।
चलचित्रमा भोलाराज सापकोटा, सरिता गिरी, आर्जेश रेग्मी, लक्ष्मी बर्देवा, निरज सिंह विष्ट, जीवन भट्टराई, रञ्जना ओली, विशाल पहारी, भरत सापकोटा, भीम मैनाली, लोकेन्द्र लेखक र उज्जवल शर्मा लगायत कलाकारहरुको अभिनय रहेको छ । यस चलचित्रमा मुकेश रेग्मी र प्रजापति सिवाकोटीको लगानी रहेको छ ।
त्यस्तै, अन्तरदेशीय प्रेम सम्बन्धको कथा प्रस्तुत गरिएको चलचित्र ‘प्रेमलीला’ पनि आजैबाट प्रदर्शनमा आएको छ । यस चलचित्रमा नायिका दीपशिखा खड्का, भारतीय मोडल अली खान र नायक मौसम खड्काको प्रमुख भूमिका रहेको छ ।नायिका खड्काकै कथा तथा लेखन रहेको फिल्मलाई जनक पाण्डेले निर्देशन गरेका हुन् ।
चलचित्रमा दीपशिखा, अलि र मौसमसँगै सुरज तमु, रेखा शाह, शर्मिला शर्मा, भारतीय कलाकारहरु अर्चना शुक्ला, ट्वीकंल श्रीवास्तव लगायत रहेका छन् ।
