काठमाडौं । आज संसद भवन नयाँ बानेश्वर विहे घर झै सिँगारिएको छ । सरकारका तर्फबाट आगामी आर्थिक वर्ष २०७६/७७ को नीति तथा कार्यक्रम प्रस्तुत गर्न राष्ट्रपति विद्यादेवी भण्डारी आउने भएपछि स्वागतका लागि सिँगारिएको हो ।
शुक्रबार अपराह्न ४ बजे राष्ट्रपति विद्यादेवी भण्डारीले सरकारद्वारा तयार पारिएको नीति तथा कार्यक्रम दुवै सदनको संयुक्त बैठकमा प्रस्तुत गर्ने कार्यक्रम तय भएको छ ।
राष्ट्रपतिले सम्बोधन नीति तथा कार्यक्रम सुरु गर्नुभन्दा आधा घण्टा अगाडि नै सांसदलाई आ–आफ्नो स्थानमा आशन ग्रहण गर्न भनिएको छ । राष्ट्रपतिका लागि सभामुखको आशनको दायाँपट्टि विशेष आशनको व्यवस्था गरिएको छ ।
राष्ट्रपति संसद भवन पुग्दा प्रधानमन्त्री केपी शर्मा ओली, सभामुख कृष्णबहादुर महरा, राष्ट्रियसभाका अध्यक्ष गणेश तिमिल्सिनालगायतले स्वागत गर्नेछन् ।
शुक्रबार बिहानैदेखि संघीय संसदका कर्मचारीहरु भवन परिसर सजावटको काममा खटिएका छन् ।उनीहरु सरसफाई, पानीको फोहोरा मिलाउने , कार्पेट विच्छाउनेलगायतका सजावटका काम व्यस्त देखिन्थे ।
संसद् भवनको गेटदेखि भित्रैसम्म नेपाली राष्ट्रिय झण्डा तथा विभिन्न ध्वजापताका राखेर सजाइएको छ ।
राष्ट्रपति विद्यादेवी भण्डारीको सवारीका लागि महराजगञ्जदेखि लैनचौर, महेन्द्र शालिक, माइतीघर हुदै नयाँ वानेश्वरसम्मको सडक खाली हुने भएको छ । उपराष्ट्रपति नन्दबहादुर पुनको पनि सोही रुटबाट सवारी हुनेछ ।
