काठमाडौं । शनिबार प्रियंकाकी आमा मधु चोपडाले छोरा सिद्धार्थको विवाह टुटेको खबर पुष्टि गरेकी छिन् । मधुले भनिन्, ‘सिद्धार्थ र इशिताको विवाह अप्रिलको अन्तिममा हुनु थियो । तर अब यो विवाह टुटेको छ । दुबैले आपसी सहमतीमा सम्बन्ध तोड्ने निर्णय गरेका हुन् ।’
केही दिन अघि प्रियंका चोपडा भाइ सिद्धार्थ चोपडाको विवाहका लागि भारत आएकी थिइन् । तर उनकी बुहारी इशिता कुमारको स्वास्थ्य अचानक खराब भयो र विवाह रोकिएको थियो । त्यसपछि उनीहरुको विवाह टुटेको हुनसक्ने अडकलबाजी गरिएको थियो ।
इशिताले आफ्नो र सिद्धार्थको फोटो इन्स्टाग्रामबाट डिलिट गरेकी छिन् । साथै अब प्रियंका र सिद्धार्थले उनलाई इन्स्टाग्राममा अनफलो गरेका छन् । हालै इशिताले आफ्नो इन्स्टाग्राममा रेष्टुरेन्टको एउटा फोटो अपलोड गरेकी थिइन् । फोटोमा उनले क्याप्सन लेखेकी छिन्, ‘निकै खुसी भएर नयाँ सुरुवात गर्दैछु । पुरानो यादलाई एक चुम्बनसहित सदाका लागि बिदा । ’
सम्बन्ध टुटेपछि इशिताको परिवारको समर्थनः
यो फोटोमा इशिताकी आमा निधि कुमारले कमेन्ट गरेकी छिन्, ‘पुरानो किताबलाई बन्द गर र नयाँ लेख ।’ यस्तै, उनका पिताले पनि यो पोष्टमा कमेन्ट गरेका छन् । उनले लेखेका छन्, ‘हामी तिम्रो साथमा छौं । तिमी त्यही तारा बन जसका लागि तिमी जन्मिएकी छौ ।’
तर अब इशिता इन्स्टाग्रामबाट गायब छिन् । यसअघि इशिताले ब्राइडल शावरका केही फोटो सोसल मिडियामा सेयर गरेकी थिइन् । दुबैको रोका (इन्गेजमेन्ट) फेब्रुअरीमा भएको थियो । विवाहको केही दिन अघि इशिता बिरामी भइन् र उनको शल्यक्रिया पनि भयो ।
