एजेन्सी । यश अभिनीत फिल्म ‘टक्सिकः ए फेयरी टेल फर ग्रोन–अप्स’ विवादमा परेको छ। फिल्मलाई लिएर सामाजिक अभियन्ता दिनेश कल्लाहल्लीले केन्द्रीय फिल्म प्रमाणन बोर्ड (सीबीएफसी) मा उजुरी दर्ता गराएका छन्। उनले टीजरमा समावेश केही दृश्यहरू अश्लील, आपत्तिजनक र नैतिक मूल्यविरुद्ध रहेको आरोप लगाएका छन्।
एएनआईको रिपोर्टअनुसार सीबीएफसीका अध्यक्ष प्रसून जोशीलाई बुझाइएको उजुरीमा सामाजिक अभियन्ताले ‘टक्सिक’ को टीजरमा अत्यधिक अश्लील, यौन रूपमा स्पष्ट र भल्गर दृश्यहरू रहेको बताएका छन्। ती दृश्यहरू खुलेआम सामाजिक सञ्जालमा उपलब्ध हुँदा बालबालिका र युवाहरूले पनि यस्ता सामग्री हेर्न बाध्य भएको र यो कानून तथा समाज दुवैका लागि उचित नभएको उनको भनाइ छ।
अभियन्ताको दाबीअनुसार उक्त टीजर अभिव्यक्ति स्वतन्त्रताको सीमाभन्दा बाहिर गएको छ। उनले सर्वोच्च अदालतका विभिन्न फैसलाहरूको उल्लेख गर्दै अश्लील र यौन रूपमा स्पष्ट सामग्रीलाई संवैधानिक संरक्षण नहुने बताएका छन्।
उनले सिनेमाटोग्राफ ऐन १९५२, फिल्म प्रमाणन नियमहरू तथा सीबीएफसीका मार्गनिर्देशनहरूको पनि सन्दर्भ दिएका छन्। उनका अनुसार फिल्म, ट्रेलर तथा प्रचार सामग्रीहरूमा शालीनता, नैतिकता र सामाजिक जिम्मेवारीका मापदण्ड पालना गर्नुपर्छ। त्यसैले टीजरको समीक्षा गरी आपत्तिजनक दृश्य हटाउन माग गरिएको छ।
उजुरीमा सीबीएफसीसँग टीजर पुनरावलोकन गर्न, आपत्तिजनक दृश्य हटाउन र त्यसको प्रसारणमा रोक लगाउन माग गरिएको छ। साथै ‘टक्सिक’ फिल्मसँग सम्बन्धित निर्देशक, निर्माता तथा जिम्मेवार व्यक्तिहरूविरुद्ध कानून र नियमअनुसार आवश्यक कारबाही गर्न पनि अपिल गरिएको छ।
उजुरीमा यो विषय सार्वजनिक नैतिकता, बालबालिकाको सुरक्षा र कानून पालनसँग जोडिएको भएकाले तुरुन्त ध्यान दिनुपर्ने उल्लेख गरिएको छ।
फिल्मका निर्माताहरूले भने हालसम्म यस उजुरीबारे कुनै प्रतिक्रिया दिएका छैनन्। यस्तै, आम आदमी पार्टी (आप) को महिला विंगले पनि यस विषयमा उजुरी दर्ता गराएको छ।
‘टक्सिक’ को टीजर जनवरी ८ मा सार्वजनिक गरिएको थियो। टीजरमा यशको पात्रलाई कारभित्र एक महिलासँग बोल्ड दृश्यमा देखाइएको छ। यही दृश्यलाई लिएर विवाद चर्किएको हो।
पार्टीको आरोप छ कि टीजरमा देखाइएको दृश्य अश्लील छ, जसले महिलाको गरिमामा आँच पुर्याउँछ। साथै यसले बालबालिका र समाजमा नकारात्मक प्रभाव पार्ने बताइएको छ। महिला विंगले टीजर सामाजिक सञ्जालबाट हटाउन र भविष्यमा यस्ता सामग्रीमाथि कडा कानून बनाउन माग गरेको छ।
यशका अघिल्ला दुई फिल्म ‘केजीएफ’ र ‘केजीएफ २’ सुपरहिट भएका थिए। तर यसपटक उनको यात्रा सहज देखिँदैन। यशको फिल्म ‘टक्सिक’ मार्च १९ मा ‘धुरन्धर २’ सँगै रिलिज हुँदैछ।
‘धुरन्धर’ को पहिलो भाग सुपरहिट रहँदै विश्वभर १२५० करोड रुपैयाँभन्दा बढी कमाइ गरिसकेको छ र अझै पनि प्रदर्शनमा छ। यस्तो अवस्थामा दुवै फिल्म एकै दिन रिलिज हुँदा ‘टक्सिक’ लाई कडा प्रतिस्पर्धा सामना गर्नुपर्ने देखिन्छ।
यश मूल रूपमा कन्नड अभिनेता भए पनि उनको गृह राज्य कर्नाटकमै फिल्मविरुद्ध विरोध देखिनु थप चुनौतीको विषय बनेको छ।
