काठमाडौं । प्रमुख प्रतिपक्षी दल नेकपा एमालेले अदालतको विवाद गुटको झगडाजस्तो भएको टिप्पणी गरेको छ । प्रेस चौतारीले आयोजना गरेको पत्रकार सम्मेलनमा बोल्दै एमालेका उपमहासचिव प्रदीप ज्ञवालीले भन्नुभयो, सर्वोच्च अदालतमा जारी आन्दोलन कुनै सुधारको लागि नभइ कसैको स्वार्थ पुरा गर्नका लागि भएको जस्तो देखिएको छ । ज्ञवालीले कतिपय पार्टीहरु अदालतविरुद्ध आफू नदेखिने, तर छद्म युद्ध लडेको पनि टिप्पणी गर्नुभयो ।
ज्ञवालीले भन्नुभयो, ‘आज भइरहेको आन्दोलनको मूल विषय न्यायालय सुधारको हड्ताल होइन, संकटकालमा समेत रोक्न नपाइने बन्दीका मुद्दाहरु समेत रोकिएको छ। यो आन्दोलन मर्यादाभन्दा बाहिर गएको र व्यक्ति केन्द्रित भएर शुरु भएको आन्दोलनले न्यायालय सुधार गर्दैन।’
एमाले स्वतन्त्र र सक्षम न्यायलयको पक्षमा रहेको उल्लेख गर्दै ज्ञवालीले न्यायालयमा विकृतिहरु छन्, हट्नुपर्छ भन्ने पक्षमा रहेको, तर कोही व्यक्ति हटाउँदैमा न्यायालयको सुधार नहुने दाबी गर्नुभयो ।
उहाँले एमाले सर्बोच्च अदालतबाट पीडित भएको दाबी गर्दै भन्नुभयो, ‘देशमा कोरोनाको महामारी हुँदा स्वास्थ्यमन्त्री राख्न पाउँदैनौ भनेर खारेज गर्ने भन्ने यही आदलत र न्यायाधीश हो,’ उहाँले भन्नुभयाे, ‘हामी विपतमा थियाैं, तर गृहमन्त्री नराख्न सर्वोच्चले भन्यो ।’
