काठमाडौं । अस्ट्रेलियाको प्रहरीले त्यहाँका पत्रकारमाथि खानतलासी गर्ने क्रम जारी राखेको छ।
पत्रकार लक्षित खानतलासीलाई निरन्तरता दिँदै आज अस्ट्रेलियन ब्रोर्डकास्टिङ कर्पोरेसन (एबीसी) को सिड्नीमा रहेको मुख्य कार्यालयमा छापा हानेको छ।
उक्त सार्वजनिक प्रसारण संस्थाको कार्यालयमा दुई संवाददाता र समाचार निर्देशकको नाम उल्लेख भएको सर्च वारेन्ट अर्थात् खानतलासी अनुमतिपत्रसहित प्रहरी अधिकारीहरू पुगेका थिए।
प्रहरीको त्यस्तो कारबाही अफगातिस्तानमा अस्ट्रेलियाली सेनाले गरेका भनिएको दुर्व्यवहारबारे प्रकाशित लेखसँग सम्बन्धित छ।प्रहरी हस्तक्षेपको एबीसीले विरोध गरेको छ।मङ्गलवार प्रहरीले न्यूज कर्पका पत्रकारको घरमा खानतलासी गरेको थियो।
एबीसीले सन् २०१७ मा चलाएको द फाइल्स श्रृखंलामा अफगानिस्तानमा परिचालित अस्ट्रेलियाको विशेष सैन्य फोर्सका सेनाहरूले गैरकानुनी हत्या र दुर्व्यवहार गरेको तथ्य उजागर गरेको थियो।
सरकारका गोप्य सरकारी दस्ताबेज सार्वजनिक गरेकाले छापा हान्नुपरेको अस्ट्रेलियाको प्रान्तीय प्रहरीले जनाएको छ।
देशको अग्रणी पत्रकार सङ्घका अनुसार प्रहरीले छापा मारेको ती दुई घटनाले अस्ट्रेलियाली प्रेस स्वतन्त्रतामाथि भइरहेको चिन्ताजनक आक्रमणको प्रतिनिधित्व गर्छन्। अन्य युनियन र मानवाधिकारवादी समूहले पनि प्रहरीको कदमको निन्दा गरेका छन्।
यसअघि गत मंगलबार न्युज कर्पका पत्रकारको घरमा पनि प्रहरीले खानतलासी गरेको थियो।
प्रहरी छापाको अस्ट्रेलियामा विरोध भइरहेको छ। अस्ट्रेलियाको पत्रकार संगठनले पत्रकार र सञ्चारमाध्यममाथि भइरहेको यो खानतलासी देशको प्रेस स्वतन्त्रतको विपक्षमा छ।
