काठमाडौं । रसुवाको भोटेकोशी नदीमा आएको भीषण बाढीबाट प्रभावित नुवाकोटस्थित त्रिशूली–३ ‘ए’ जलविद्युत् आयोजनाको केबल डक्ट टनेलको मुख खुलाउने काम तीव्र पारिएको छ।
बाढीका कारण आयोजनाका सुरुङ तथा मुख्य संरचनाहरू पुरिएपछि त्यहाँ मानिसहरू फसेको आशंकामा नेपाली सेनाको नेतृत्वमा चिनियाँ टोलीसहित ९३ जनाको उद्धार टोली खोजी तथा उद्धारमा जुटेको छ। टोलीले पाँचवटा एक्स्क्याभेटर, कम्प्रेसर र ब्रेकरलगायतका उपकरण प्रयोग गरिरहेको छ।
सुरुङको मुखमा करिब ४० मिटर लामो र २० मिटर अग्लो भत्किएका फलामे संरचना तथा ठूला ढुंगा र अन्य डेब्रिस थुप्रिएका छन्। रातदिन निरन्तर प्रयासपछि उद्धार टोलीले माथिल्लो भागबाट करिब तीन फिट सुरुङको मुख खुलाउन सफल भएको छ।
सुरुङको मुख केही खुलेसँगै उद्धार टोली करिब १५–२० मिटर भित्रसम्म प्रवेश गरिसकेको छ। यद्यपि, एक्स्क्याभेटर तथा अन्य मेसिनहरू सुरुङभित्र लैजान सक्ने गरी प्रवेशद्वार पूर्ण रूपमा खुलाउनुपर्ने भएकाले बाँकी डेब्रिस हटाउने काम जारी छ।
ठूला ढुंगा हटाउन थप सातवटा बोल्डर ब्लास्टिङका लागि तयारी अवस्थामा राखिएको छ। सुरुङमा थुप्रिएको डेब्रिस हटाउँदै सुरक्षित रूपमा उद्धार तथा खोजी कार्य अघि बढाइएको टोलीले जनाएको छ।
करिब १७० मिटर लामो उक्त सुरुङ माटो, लेदो र डेब्रिसले भरिएको छ। सुरुङको सम्पूर्ण भाग छिचोलेपछि मात्रै आयोजनाको पावरहाउस लगायतका भित्री संरचनासम्म पुग्न सकिने भएकाले उद्धार टोलीले सुरुङ खुलाउने कामलाई प्राथमिकतामा राखेको छ।
