काठमाडाैँ । त्रिशूली नदीमा आएको बाढीका कारण गल्छी–त्रिशूली राजमार्ग तथा त्रिशूली नदीमाथिका विभिन्न पुलमा क्षति पुगेपछि अवरुद्ध भएको यातायात सञ्चालनका लागि वैकल्पिक सडकहरू निर्माण, मर्मत तथा स्तरोन्नति गरिएको छ ।
रसुवा र धादिङसमेत हेर्ने सडक डिभिजन कार्यालय नुवाकोटले बाढीबाट प्रभावित सडकखण्डमा वैकल्पिक मार्ग निर्माण तथा मर्मत गरी यातायात सञ्चालनमा ल्याएको हो । कार्यालयका अनुसार हाल चार वटा वैकल्पिक मार्ग सञ्चालनमा ल्याइएको छ ।
पृथ्वी राजमार्ग–धादिङबेसी वैकल्पिक मार्ग अन्तर्गत मास्टारदेखि त्रिशूली पुल पार गर्दै केउरिनीटार, बेलिनटार, आदमटार, पिपलटार, गजुरीटार, नेपालटार, परेवाटार हुँदै धादिङबेसीसम्म करिब १५ किलोमिटर सडक सञ्चालनमा ल्याइएको छ । यसबाट धादिङको गल्छी र सिद्धलेक क्षेत्रका नागरिकलाई आवतजावतमा सहज भएको छ ।
त्यस्तै, त्रिशूली नदीपारिको क्षेत्रलाई यातायात सञ्जालसँग जोड्न करिब ४० किलोमिटर लामो त्रिशूली पार क्षेत्र जोड्ने वैकल्पिक मार्ग सञ्चालनमा ल्याइएको छ । गल्छी–त्रिशूली राजमार्गको त्रिशूली पुल पारिबाट नदीको दायाँ किनार हुँदै कल्लेरीटार, कोशीखोला, पिमलटार, दर्शनटार, छत्रेखोला, गौरीबेसी हुँदै त्रिशूली बजार र किस्पाङ गाउँपालिकाको सीमासम्म सडक सञ्चालन गरिएको हो । यसबाट धादिङको सिद्धलेक तथा नुवाकोटका तारकेश्वर, विदुर र मेघाङ क्षेत्र लाभान्वित भएका छन् ।
देवीघाटस्थित क्षतिग्रस्त तादी खोला पुलको विकल्पका रूपमा पनि करिब ३५ किलोमिटर सडक सञ्चालनमा ल्याइएको छ । पिपलटार–धमले–निरञ्जना–बाघखोर–हर्रे–देउराली–कोल्पुटार सडकमार्फत चारपाङ्ग्रे सवारीसाधन सञ्चालन गर्न मिल्ने बनाइएको सडक डिभिजन नुवाकोटले जनाएको छ । उक्त मार्गबाट नुवाकोटको विदुर र बेलकोटगढी क्षेत्रलाई आवतजावतमा सहयोग पुगेको छ ।
यसैगरी, त्रिशूलीदेखि बेत्रावतीसम्मको राजमार्ग क्षतिग्रस्त भएपछि रसुवा आवतजावतका लागि करिब १२ किलोमिटर नुवाकोट खण्डको वैकल्पिक सडक सञ्चालनयोग्य बनाइएको छ । मध्यपहाडी राजमार्गअन्तर्गत ढिकुरे हुँदै फेदी, बेसीचोक, हिरामुनिटार, चोगते, बोरेभञ्ज्याङ, सानोखोला, धनस्वारा, भोर्ले, जिबजिबे र बोगटीटारसम्म सडक सञ्चालनमा ल्याइएको हो । रसुवा खण्डमा भने सडक मर्मतको काम जारी रहेको छ । यसबाट नुवाकोटको विदुर र सूर्यगढी क्षेत्रलाई समेत सहजता पुगेको छ ।
सडक डिभिजन नुवाकोटले आपतकालीन अवस्थामा विभिन्न उपकरण परिचालन गरी सडक खुलाउने, पहिरो हटाउने, कल्भर्ट निर्माण गर्ने, सडक सतह सुधार गर्ने तथा ग्राभेल राख्नेलगायतका काम निरन्तर गरिरहेको जनाएको छ ।
बाढीका कारण मुख्य राजमार्ग तथा पुलहरूमा क्षति पुगेपछि वैकल्पिक सडक सञ्चालनमा ल्याइएसँगै रसुवा, नुवाकोट र धादिङका प्रभावित क्षेत्रबीच यातायात सम्पर्क पुनःस्थापित गर्न सहयोग पुगेको छ ।
