काठमाडौँ । जडीबुटी उत्पादन तथा प्रशोधन कम्पनी लिमिटेड आफ्नो स्थापनाको ४० वर्षमा पहिलोपटक खुद नाफा आर्जन गर्न सफल भएको छ । विसं २०३८ मा स्थापना भएको कम्पनीले आर्थिक वर्ष २०७६/०७७ मा करिब रु सात लाख कम्पनीका कामदार तथा कर्मचारीलाई बोनस बाँढिएको कम्पनीका महाप्रबन्धक ज्ञानेश्वर कार्कीले बताउनुभएको छ ।
महाप्रबन्धक कार्कीले आज एक विज्ञप्ति जारी गर्दै विश्वभर महामारीका रुपमा फैलिएको कोडिड–१९ का कारण नेपालसमेत आक्रान्त भएको र करिब एक वर्ष बन्दाबन्दी हुँदासमेत कम्पनीले गरेको अथक प्रयासस्वरुप कम्पनीले यसरी नाफा गर्न सफल भएको र कर्मचारी तथा श्रमिकहरुलाई बोनस बाँढ्ने अवस्थामा आइपुगेको बताउनुभएको छ ।
विशेषगरी कम्पनीमा मौजुदा अत्यन्तै न्यून जनशक्ति र स्रोतसाधनलाई अधिकतम उपयोग गर्दै मुख्यतः कम्पनीको लोकप्रिय उत्पादन ‘सन्चो’ लगायत अन्य उत्पादनको विक्री प्रणालीमा गरिएको सुधारका कारण कम्पनी मुनाफा हासिल गर्ने अवस्थामा आइपुगेको विज्ञप्तिमा उल्लेख छ ।
विगत २८ वर्षदेखि हुननसकेको साधारणसभा सम्पन्न भएको र प्रत्येक वर्ष नियमित साधारणसभा गर्ने तथा नियमित लेखापरीक्षण गरिने पनि विज्ञप्तिमा बताइएको छ । कम्पनीको उन्नति र प्रगतिले निरन्तरता पाउने विश्वास व्यक्त गर्दै महाप्रबन्धक कार्कीले कम्पनीसँग सरोकार राख्ने सबैमा हार्दिक धन्यवाद व्यक्त गर्नुभएको छ ।
