गोरखा । गोरखाको चुमनुब्री गाउँपालिकास्थित जगत क्षेत्रमा आएको भीषण बाढीले बूढीगण्डकी नदीको तटीय क्षेत्रमा ठूलो जोखिम निम्त्याएको छ । बाढीका कारण आरुघाटस्थित बाढी मापन केन्द्र र पुलसमेत बगेका छन् । नदीमा गेग्रानसहितको ठूलो बहाव आएपछि बेनीघाटसम्मको क्षेत्रलाई अति उच्च जोखिममा राखिएको छ ।
आइतबार बिहान करिब ४ बजेदेखि सुरु भएको बाढी तीन चरणमा आएको प्रारम्भिक तथ्याङ्कले देखाएको छ । बाढी पूर्वानुमान शाखाका अनुसार बिहान ६ः३० बजेदेखि नदीको जलस्तर बढ्न थालेको थियो । बिहान ७ः५० बजे जलस्तर पाँच मिटरको खतराको तह पार गरेको र बिहान ८ः४५ बजेतिर ८.५ मिटर पुगेको थियो ।
त्यसपछि बाढीले आरुघाटस्थित बाढी मापन केन्द्र र पुल बगाएकाले थप तथ्याङ्क प्राप्त हुन नसकेको बाढी पूर्वानुमान शाखाले जनाएको छ ।
बाढी पूर्वानुमान शाखाका प्रमुख विनोद पराजुलीका अनुसार चुमनुब्री गाउँपालिकाको माथिल्लो हिमाली क्षेत्रमा गएको पहिरोका कारण नदी थुनिएर क्रमिक रूपमा खुल्दा विभिन्न चरणमा बाढी आएको हुनसक्ने प्रारम्भिक अनुमान गरिएको छ । उपग्रहबाट प्राप्त प्रारम्भिक तस्बिरमा हिमाली क्षेत्रमा ठूलो पहिरो देखिए पनि बाढीको वास्तविक कारणबारे थप अध्ययन भइरहेको उनले बताए ।
बाढीको जोखिमलाई मध्यनजर गर्दै शाखाले बूढीगण्डकी नदीको तल्लो तटीय क्षेत्रसँगै त्रिशूली र नारायणी नदी करिडोरका बासिन्दालाई उच्च सतर्कता अपनाउन आग्रह गरेको छ ।
शाखाका अनुसार बेनीघाटसम्म अति उच्च जोखिम, मुग्लिनसम्म उच्च जोखिम र मुग्लिनभन्दा तलका तटीय क्षेत्रमा मध्यम जोखिम रहेको छ । बूढीगण्डकीको बाढी त्रिशूली नदीमा मिसिँदा त्रिशूलीको जलस्तर करिब तीन मिटर बढ्न सक्ने अनुमान गरिएको छ ।
यसैगरी, देवघाटमा पनि जलस्तर उल्लेख्य रूपमा बढ्न सक्ने भएकाले चितवन र नवलपरासी पूर्वका नदी तटीय क्षेत्रका बासिन्दालाई सतर्क रहन आग्रह गरिएको छ । आइतबार साँझसम्म नदीको बहाव सामान्य अवस्थामा नफर्किएसम्म जोखिमयुक्त क्षेत्रका बासिन्दालाई विशेष सावधानी अपनाउन अनुरोध गरिएको छ ।
बाढीका कारण गोरखा क्षेत्रमा फसेका छ जनालाई नेपाली सेनाको हेलिकप्टरमार्फत सकुशल उद्धार गरिएको छ । सम्भावित मानवीय क्षति रोक्न सम्बन्धित निकायले सूचना प्रवाह, जोखिमयुक्त बस्ती खाली गराउने तथा उद्धार कार्यलाई तीव्रता दिएका छन् ।
बूढीगण्डकी, त्रिशूली र नारायणी नदी आसपासका बासिन्दालाई नदी किनारमा नजान, जलस्तरको परिवर्तनबारे जानकारी लिइरहन तथा सुरक्षित स्थानमा रहन आग्रह गरिएको छ ।
