काठमाडौं । निजी तथा आवासीय विद्यालय अर्गनाइजेसन नेपाल (प्याब्सन) ले भोटेकोशी नदीमा आएको विनाशकारी बाढीबाट प्रभावित जिल्लाका विद्यालय तथा विद्यालय परिवारको उद्धार, राहत र पुनःस्थापनालाई प्राथमिकता दिन आग्रह गरेको छ।
प्याब्सनका अध्यक्ष कृष्णप्रसाद अधिकारी र महासचिव आरबी कटवालद्वारा जारी विज्ञप्तिमा विपद्मा परेका सम्पूर्ण परिवार, विद्यार्थी, शिक्षक, विद्यालय समुदाय तथा स्वदेशी–विदेशी नागरिकप्रति ऐक्यबद्धता प्रकट गर्दै ‘सतर्क रहौं, सुरक्षित रहौं र विपद्मा परेकालाई सहयोग गर्न हातेमालो गरौं’ भन्ने अपिल गरिएको छ।
विज्ञप्तिमार्फत रसुवा, नुवाकोट, धादिङ, गोरखालगायत जिल्लामा बाढीबाट भएको जनधनको क्षतिप्रति गहिरो दुःख व्यक्त गर्दै विपद्मा ज्यान गुमाएकाहरूप्रति श्रद्धाञ्जली तथा शोकसन्तप्त परिवारमा समवेदना प्रकट गरेको हो।
प्याब्सनले बेपत्ता नागरिकको तत्काल खोज तथा उद्धार, घाइतेको शीघ्र उपचार तथा प्रभावित परिवारलाई राहत, सुरक्षित बसोबास र पुनःस्थापनाका लागि सरकार तथा सम्बन्धित निकायसँग सहकार्य गर्ने प्रतिबद्धता जनाएको छ।
बाढीका कारण विद्यार्थी, शिक्षक तथा विद्यालय परिवारसमेत प्रभावित भएको र कतिपय विद्यालय तथा शैक्षिक संरचनामा क्षति पुगेको भन्दै प्याब्सनले प्रभावित विद्यालयको शैक्षिक गतिविधि यथाशीघ्र पुनःसुचारु गर्न विशेष प्राथमिकताका साथ आवश्यक समन्वय गर्न आग्रह गरेको छ।
प्याब्सनले देशका विभिन्न स्थानमा भ्रमणका लागि पुगेका नेपाली तथा विदेशी पर्यटकसमेत बाढीबाट प्रभावित भएकोप्रति दुःख व्यक्त गर्दै मृतक तथा बेपत्ताप्रति श्रद्धाञ्जली र परिवारजनमा समवेदना व्यक्त गरेको छ।
विपद्को कठिन समयमा सरकार, स्थानीय तह, सुरक्षा निकाय, सामाजिक संघसंस्था, विद्यालय समुदाय तथा नागरिक समाजलाई एकताबद्ध भएर उद्धार, राहत र पुनःस्थापनामा परिचालित हुन प्याब्सनले आह्वान गरेको छ।
प्रभावित विद्यालय तथा विद्यालय परिवारलाई आवश्यक सहयोगका लागि प्रदेश तथा जिल्ला प्याब्सनसँग समन्वय गरी सक्दो पहल गर्ने प्याब्सनले जनाएको छ।
