काठमाडौं । परराष्ट्रमन्त्री शिशिर खनालले मुलुकको रूपान्तरणका लागि शिक्षा क्षेत्रमा बौद्धिक बहस र आन्दोलन आवश्यक रहेको बताउनुभएको छ।
ग्रामीण आदर्श बहुमुखी क्याम्पसको प्रथम क्याम्पस सभाको आज उद्घाटन गर्दै मन्त्री खनालले समाज र देशलाई सही दिशामा अघि बढाउन प्राज्ञिक क्षेत्रको महत्वपूर्ण भूमिका रहने बताउनुभयो।
उहाँले अबको नेपालको शिक्षा कस्तो हुनुपर्छ भन्ने विषयमा गम्भीर बौद्धिक बहस आवश्यक रहेको उल्लेख गर्नुभयो। तलबभत्ता र सेवा–सुविधाका लागि मात्र गरिने आन्दोलनले मुलुकको रूपान्तरण गर्न नसक्ने उहाँको भनाइ थियो।
“मुलुकको रूपान्तरणका लागि बौद्धिक आन्दोलन आवश्यक छ,” मन्त्री खनालले भन्नुभयो।
कार्यक्रममा पूर्वमन्त्री राजेन्द्र श्रेष्ठले युवालाई स्वदेशमै बस्ने वातावरण निर्माण गर्न सरकारले प्राथमिकता दिनुपर्नेमा जोड दिनुभयो। उहाँले रोजगारी तथा अवसरको अभावमा युवाहरू विदेशिनुपर्ने अवस्थाको अन्त्य गर्न राज्यले दीर्घकालीन नीति बनाउनुपर्ने बताउनुभयो।
क्याम्पस सञ्चालक समितिका अध्यक्ष रामेश्वर बोहराले समयअनुकूल तथा व्यावहारिक शिक्षालाई केन्द्रमा राखेर गुणस्तरीय शिक्षा प्रदान गर्न क्याम्पस प्रतिबद्ध रहेको बताउनुभयो। उहाँले बदलिँदो आवश्यकता र श्रम बजारअनुसार शिक्षालाई व्यवहारमुखी बनाउनुपर्नेमा जोड दिनुभयो।
