काठमाडाैँ ।राष्ट्रिय सभामा नेपाली काँग्रेसकी सांसद विष्णुकुमारी सापकोटाले मुलुकमा बढ्दै गएको मानसिक स्वास्थ्य समस्या, सामाजिक विचलन र कृषि क्षेत्रका चुनौतीहरूलाई सम्बोधन गर्न योग र ध्यानलाई राष्ट्रिय जीवनशैली बनाउनुपर्ने बताउनुभएको छ ।
राष्ट्रिय सभाको बिहीवारको बैठकमा बोल्दै सांसद सापकोटाले यस्तो बताउनुभएको हो । सांसद सापकोटाले नेपालमा लोकतन्त्र र नागरिक अधिकार प्राप्तिका लागि विगत ८० वर्षदेखि नेताहरूले गरेको योगदानको स्मरण गर्नुभयो ।
उहाँले जननेता बीपी कोइरालाको राष्ट्रिय मेलमिलापको नीति र पूर्वप्रधानमन्त्री शेरबहादुर देउवाको लोकतान्त्रिक आन्दोलनमा रहेको भूमिकाको चर्चा गर्दै प्राप्त अधिकारको जगमा उभिएर वर्तमान समस्याहरूको समाधान खोज्नुपर्ने बताउनु भयो । सांसद सापकोटाले प्रविधिको विकाससँगै सामाजिक सञ्जालको दुरुपयोग बढेको र यसले सामाजिक तथा पारिवारिक सम्बन्धमा दरार ल्याएको उल्लेख गर्नुभयो । पश्चिमी संस्कृतिको अन्ध अनुकरणले नेपाली मौलिकता र संस्कार हराउँदै गएकोमा उहाँले चिन्ता व्यक्त गर्नुभयो ।
उहाँले कृषकले भोग्नुपरेको बाँदर र अन्य जंगली जनावरको आतंक, बजारमा देखिएको खाना पकाउने ग्यासको अभाव तथा विद्युत आपूर्तिमा देखिएको अनियमितताप्रति सरकारको ध्यानाकर्षण गराउनु भयो ।
यी समस्याहरूको समाधानका लागि योग, ध्यान र आध्यात्मिक चिन्तनलाई राज्यले नै प्राथमिकता दिनुपर्ने उहाँको प्रश्ताव छ । गुल्मीको रेसुङ्गा र सालिमे दहजस्ता ऐतिहासिक तपोभूमिलाई केवल पर्यटकीय स्थलमा सिमित नराखी आध्यात्मिक र अनुसन्धान केन्द्रका रूपमा विकास गर्नुपर्ने उहाँले बताउनु भयो ।
उहाँले विद्यालयदेखि विश्वविद्यालयसम्म योग र ध्यानको वैज्ञानिक अभ्यास गराउन र सरकारी कर्मचारीहरूका लागि नियमित योग कक्षा सञ्चालन गर्न माग गर्नुभयो । यसैगरी, कर्मचारीको अवकाश नीति र वैदेशिक रोजगारीको विषयमा बोल्दै उहाँले ५५ वर्षमै कर्मचारीलाई अवकाश दिने नीतिले अनुभवी जनशक्ति खेर गइरहेको तर्क गर्नुभयो । –न्युज एजेन्सी नेपाल
