काठमाडौं । वागमती प्रदेशको उद्योग, पर्यटन, श्रम तथा यातायात मन्त्रालयका सचिव दीपेन्द्र सुवेदीले पर्यटन क्षेत्र मुलुकको आर्थिक समृद्धि, रोजगारी सिर्जना, उद्यमशीलता र स्थानीय अर्थतन्त्र विकासको महत्वपूर्ण आधार भएको बताउनुभएको छ ।
आइतबार विश्व पर्यटन दिवस–२०२६ को अवसरमा काठमाडौंमा आयोजित कार्यक्रममा बोल्दै सचिव सुवेदीले पर्यटनलाई राष्ट्रिय समृद्धि र वातावरणीय दिगोपनासँग जोडेर अघि बढाउनुपर्ने बताउनुभयो ।
उहाँले नेपालको प्राकृतिक सौन्दर्य, हिमाल, पहाड, नदी, वनजङ्गल, जैविक विविधता तथा ऐतिहासिक सम्पदाको संरक्षणसँगै प्रचारप्रसारमा जोड दिनुपर्ने बताउनुभयो । नेपालको मौलिक संस्कृति र विविधता पर्यटन विकासको महत्वपूर्ण आधार भएको उल्लेख गर्दै उहाँले यसको संरक्षण गरी नयाँ पुस्तामा हस्तान्तरण गर्नुपर्ने आवश्यकता औँल्याउनुभयो ।
नेपालको शान्ति, प्राकृतिक सम्पदा र सांस्कृतिक विविधता विश्वका पर्यटकका लागि आकर्षणको केन्द्र रहेको बताउँदै सचिव सुवेदीले यी सम्पदाको संरक्षण गर्नु सबैको साझा दायित्व भएको उल्लेख गर्नुभयो ।
विश्वका १४ अग्ला हिमालमध्ये आठवटा नेपालमा रहेको तथा विभिन्न जातजाति र भाषाभाषीको विविधताले नेपालको पर्यटनलाई विशिष्ट बनाएको उहाँको भनाइ छ ।
सचिव सुवेदीले पर्यटन क्षेत्रको विकासका लागि वागमती प्रदेश सरकारले सन् २०२५ देखि २०४० सम्मको रणनीति बनाएर काम गरिरहेको जानकारी दिनुभयो । पर्यटन क्षेत्रलाई आर्थिक गतिविधि र रोजगारीसँग जोड्दै स्थानीय अर्थतन्त्रलाई थप बलियो बनाउने गरी प्रदेश सरकारले काम गरिरहेको उहाँले बताउनुभयो ।
उहाँले पर्यटन क्षेत्रमा देखिने विभिन्न चुनौतीका कारण निर्धारित लक्ष्य हासिल गर्न कठिनाइ हुने गरेको उल्लेख गर्दै त्यसका बाबजुद पर्यटन विकासको रणनीतिअनुसार अघि बढिरहेको बताउनुभयो ।
वागमती प्रदेश सरकारले सन् २०२७ लाई ‘वेलनेस इयर’ का रूपमा मनाउने गरी तयारी गरिरहेको पनि सचिव सुवेदीले जानकारी दिनुभयो ।
