काठमाडौं । वागमती प्रदेशका उद्योग, पर्यटन, श्रम तथा यातायातमन्त्री राजेन्द्र प्रजापतीले संघीयता कार्यान्वयन भएको नौ वर्ष पुग्न लाग्दासमेत तीन तहका सरकारबीचको कार्यशैली र समन्वयमा अपेक्षित सुधार हुन नसकेको बताउनुभएको छ ।
विश्व पर्यटन दिवस–२०२६ को अवसरमा आइतबार काठमाडौंमा आयोजित कार्यक्रममा बोल्दै मन्त्री प्रजापतीले उद्योग, पर्यटन तथा यातायात क्षेत्रका काममा संघ, प्रदेश र स्थानीय सरकारबीच द्वन्द्वजस्तो अवस्था देखिएको बताउनुभयो ।
तीन तहका सरकारबीच पर्याप्त समन्वय हुन नसक्दा सेवा प्रवाह तथा पूर्वाधार विकासका काम प्रभावित भइरहेको उहाँको भनाइ छ । संघीय शासन प्रणालीमा सरकारका तीन तहबीच प्रभावकारी समन्वय हुन नसके राज्य सञ्चालनमै कठिनाइ हुने उहाँले बताउनुभयो ।
“संघ, प्रदेश र स्थानीय सरकारबीच पर्याप्त मात्रामा समन्वय हुन सकेको छैन भन्ने आभास हुन्छ । मैले काम गर्दाखेरी उद्योग, पर्यटन र यातायातको क्षेत्रमा कतै संघ सरकारसँग, कतै प्रदेश र कतै स्थानीय सरकारसँग द्वन्द्व भएको जस्तो लाग्छ,” उहाँले भन्नुभयो ।
मन्त्री प्रजापतीले संघीयता लागू भएको नौ वर्ष पुग्न लाग्दा पनि काम गर्ने शैलीमा सुधार हुन नसकेकोप्रति आफूलाई पीडा भएको बताउनुभयो । जिम्मेवारीमा रहेका व्यक्तिहरू राज्य सञ्चालनप्रति गम्भीर र जिम्मेवार हुनुपर्ने उहाँको भनाइ थियो ।
उहाँले वागमती प्रदेशको यातायात क्षेत्रलाई व्यवस्थित बनाउन प्रदेश सरकार क्रियाशील रहेको बताउनुभयो । सवारी चालक अनुमतिपत्र जारी तथा नवीकरण र सवारीसाधनको ब्लुबुक नवीकरण गर्ने सफ्टवेयरमा समस्या देखिँदा सेवाग्राहीले सहज रूपमा सेवा पाउन नसकेको भन्दै त्यसको समाधानका लागि काम भइरहेको उहाँले जानकारी दिनुभयो ।
उद्योग तथा पर्यटन क्षेत्रको विकासमा समेत संघीय सरकारसँग पर्याप्त समन्वय हुन नसकेको उहाँले बताउनुभयो । गत भदौ १० गते रसुवाको भोटेकोशीमा आएको बाढीबाट भएको मानवीय तथा भौतिक क्षतिको यकिन तथ्यांकसमेत प्रदेश सरकारसँग नरहेको उहाँले उल्लेख गर्नुभयो ।
कानुनी जटिलता र संघीय सरकारसँगको समन्वय अभावका कारण बाढीबाट मृत्यु भएका पर्यटक तथा व्यवसायीको तथ्यांक संकलन गर्न समस्या भएको उहाँको भनाइ थियो ।
मन्त्री प्रजापतीले पर्यटन क्षेत्रको विकासका लागि संघ, प्रदेश र स्थानीय सरकारबीच प्रभावकारी समन्वय आवश्यक रहेकोमा जोड दिनुभयो ।
