काठमाडौं । अविरल वर्षासँगै आएको बाढीका कारण देशका विभिन्न स्थानमा विद्युत उत्पादन र प्रसारण प्रभावित भएको छ । नेपाल विद्युत प्राधिकरणका अनुसार बाढीका कारण करिब १ हजार मेगावाट विद्युत उत्पादन अवरुद्ध भएको छ ।
आश्विन ८ गतेदेखि सुरु भएको न्यूनचापीय मनसुनका कारण देशभर भइरहेको वर्षा र बाढीले विभिन्न प्रसारण लाइनमा क्षति पुर्याएपछि विद्युत उत्पादन तथा आपूर्तिमा असर परेको हो ।
बाढीका कारण कालीगण्डकी करिडोर प्रसारण लाइन अवरुद्ध हुँदा उक्त प्रसारण लाइनमार्फत प्रवाह हुने १३ वटा विद्युत उत्पादन केन्द्रबाट करिब ३७० मेगावाट विद्युत उत्पादन बन्द भएको प्राधिकरणले जनाएको छ ।
त्यस्तै, म्याग्दी, स्याङ्जा, कास्की, लमजुङ र तनहुँमा रहेका थप १४ वटा विद्युत उत्पादन केन्द्रमा नदीको अत्यधिक बहावका कारण करिब ६३० मेगावाट उत्पादन बन्द भएको छ । यसरी बाढीका कारण प्रणालीमा करिब १ हजार मेगावाट विद्युत उत्पादन अवरुद्ध भएको हो ।
विद्युत उत्पादनमा आएको कमीका कारण आपूर्ति प्रणाली सन्तुलनमा राख्न केही उद्योगको विद्युत खपत घटाएर व्यवस्थापन गरिएको प्राधिकरणले जनाएको छ ।
यसैबीच, नेपाल विद्युत प्राधिकरणको सहायक कम्पनी रघुगंगा जलविद्युत कम्पनीद्वारा प्रवर्द्धित ४० मेगावाट क्षमताको राहुघाट जलविद्युत केन्द्रको स्वीचयार्डमा कालीगण्डकी नदीले कटान गरी क्षति पुर्याएको छ । बाढी तथा पहिरोबाट अन्य स्थानमा भएको क्षतिको विवरण संकलन भइरहेको प्राधिकरणले जनाएको छ ।
कुलेखानीस्थित इन्द्रसरोवर जलाशयको पानीको सतह पनि बढेको छ । आइतबार दिउँसो १ बजेसम्म जलाशयको पानीको सतह १ हजार ५२६ दशमलव ४२ मिटर पुगेको प्राधिकरणले जनाएको छ ।
जलाशयको सतह सुरक्षित तहमा कायम राख्न कुलेखानी जलविद्युत आयोजना २४ घण्टा पूर्ण क्षमतामा सञ्चालन गरिएको छ । जलाशयको सतह थप बढेमा अपनाउनुपर्ने आवश्यक सुरक्षात्मक उपायका लागि सम्पूर्ण संयन्त्र तयारी अवस्थामा राखिएको प्राधिकरणले जनाएको छ ।
