काठमाडौं । पूर्वप्रधानन्यायाधीश चोलेन्द्रशम्शेर जबरालाई ‘जेनजीबाट सुरक्षा थ्रेट’ रहेको भन्दै प्रहरीले मध्यरातमा नियन्त्रणमा लिएको घटनामाथि जेनजी अभियन्ता रक्षा बमले प्रश्न उठाएकी छन्।
बमले सामाजिक सञ्जालमार्फत जबरालाई पक्राउ गर्दा पक्राउ पुर्जी नलिइएको र सुरक्षा जोखिमको कारण देखाइएको भन्दै सरकार तथा सुरक्षा निकायको कार्यशैलीमाथि प्रश्न उठाएकी हुन्।
‘दुई तिहाइको सुरक्षा दिने तरिका पनि गज्जबकै रहेछ,’ उनले लेखेकी छन्, ‘पूर्वप्रधानन्यायाधीश चोलेन्द्रशम्शेर जबरालाई जेनजीबाट सुरक्षा थ्रेट भयो भनेर मध्यरातमा पक्राउ पुर्जीबिनै लगिएको रहेछ।’
उनले ‘जेनजी’ कुनै आतंकवादी संगठन वा भूमिगत सशस्त्र समूह हो कि भन्दै प्रश्न गरेकी छन्। ‘शक्तिको मातमा आफूखुसी पक्राउ गर्ने, मनलाग्दी आरोप लगाउने, न विधि मान्ने न प्रक्रिया मान्ने, अनि कारण के भन्दा जेनजी रे,’ बमले लेखेकी छन्।
उनले सुरक्षा थ्रेटको आधार र प्रमाण सार्वजनिक गर्नसमेत माग गरेका छन्। ‘यदि जेनजी कुनै संगठित सुरक्षा खतरा हो भने त्यसको प्रमाण कहाँ छ ? र यदि छैन भने, यो सरासर दुई तिहाइको शक्तिको डर देखाएर पक्राउ गरेको हो, अरू केही होइन,’ उनले भनेकी छन्।
बमले राजनीतिक दाउपेच मिलाउन नसकेर मध्यरातमा पक्राउ गर्ने र त्यसको कारणमा ‘जेनजी’को नाम प्रयोग गरिएको आरोपसमेत लगाएकी छन्।
‘हाम्रा सुरक्षा निकायको कतिसम्म दुरुपयोग गरिरहेको सरकार? नगर प्रहरी चलाए जसरी चलाउँछु भन्ने सोच्नुभयो क्या हो?’ उनले प्रश्न गरेकी छन्।
