काठमाडौं । प्रतिनिधि सभाको अर्थ समितिले अन्तर्राष्ट्रिय विमानस्थलको पूर्वाधार विस्तार तथा व्यवस्थापन गर्न सरकारलाई निर्देशन दिएको छ ।
बिहीबार बसेको समितिको बैठकले विमानस्थलको पूर्वाधार विस्तारसँगै उद्योगका लागि भरपर्दो विद्युत् आपूर्ति र जलविद्युत् क्षेत्रमा लगानी सुरक्षासहित चार विषयमा सरकारलाई निर्देशन दिने निर्णय गरेको हो ।
समितिका सभापति डा. कृष्णहरि बुढाथोकीका अनुसार विभिन्न उपसमितिले गरेको स्थलगत अध्ययन तथा अनुगमनबाट प्राप्त सुझावका आधारमा सम्बन्धित मन्त्रालय तथा निकायलाई निर्देशन दिने निर्णय गरिएको हो ।
समितिले अन्तर्राष्ट्रिय विमानस्थलमा रहेका अध्यागमन तथा भन्सार कार्यालयका परिसर साँघुरा भएकाले आवश्यक विस्तार तथा व्यवस्थापन गर्न संस्कृति, पर्यटन तथा नागरिक उड्डयन मन्त्रालयमार्फत नेपाल नागरिक उड्डयन प्राधिकरणलाई निर्देशन दिएको छ ।
त्यस्तै, अन्तर्राष्ट्रिय विमानस्थलका भौतिक संरचनाको नियमित मर्मतसम्भार गरी चुस्तदुरुस्त राख्न तथा ती संरचनाको प्रयोग गर्दा सर्वसाधारण नागरिकमाथि अनावश्यक आर्थिक भार नपर्ने गरी उचित नियमन र व्यवस्थापन गर्न पनि प्राधिकरणलाई निर्देशन दिइएको सभापति बुढाथोकीले जानकारी दिनुभयो ।
समितिले नेपालमा सञ्चालित उद्योगका लागि प्रतिस्पर्धी दरमा गुणस्तरीय र भरपर्दो विद्युत् आपूर्ति सुनिश्चित गर्न आवश्यक व्यवस्था मिलाउन ऊर्जा, जलस्रोत तथा सिँचाइ मन्त्रालयलाई पनि निर्देशन दिएको छ ।
जलविद्युत् आयोजनामा स्थानीयबाट विभिन्न माग राख्दै अवरोध सिर्जना गर्ने र आर्थिक बार्गेनिङ गर्ने प्रवृत्तिले लगानीकर्तामा असुरक्षाको अवस्था सिर्जना भएको निष्कर्ष निकाल्दै समितिले प्रभावित स्थानीयले पाउने सुविधा सुनिश्चित गर्न सरकारलाई निर्देशन दिएको छ ।
जलविद्युत् क्षेत्रमा भएको लगानी तथा लगानीकर्ताको सुरक्षाको प्रत्याभूति यथाशीघ्र गर्न ऊर्जा, जलस्रोत तथा सिँचाइ मन्त्रालय र गृह मन्त्रालयलाई निर्देशन दिने निर्णय पनि समितिले गरेको छ ।
सभापति बुढाथोकीका अनुसार चारवटा विषयगत समितिले गरेको अध्ययनबाट प्राप्त सुझावका आधारमा समितिले विभिन्न विषयमा १३ बुँदामा निर्देशन दिने निर्णय गरेको छ । त्यस्तै, चारवटा विषयमा सम्बन्धित विषयगत समितिलाई जानकारी गराउने गरी निर्देशन दिने निर्णय भएको उहाँले बताउनुभयो ।
