काठमाडौं । गत अगस्ट ५ मा जम्मु–कश्मीर राज्यको स्वायत्तताको खारेजीसँगै भारत सरकारले कश्मिरी अभियानकर्ता, स्थानीय नेता, व्यापारी तथा युवाविद्यार्थीसहित हजारौं मानिसलाई गिरफ्तार गरी उत्तर प्रदेशका विभिन्न जेलहरुमा स्थानान्तरण गरेको छ । सुरुमा कश्मिरी जेलमा राखिएका यी सबैलाई सुरक्षाको हवालादिंदै रातारात उत्तर प्रदेशका जेलहरुमा सारिएको थियो ।
भारतीय संविधानको धारा ३७० को खारेजीसँगै संकटकाल घोषणासहित घरघरमा भारतीय सेना पसी छापामारेर गिरफ्तार गरिएका कश्मिरीहरु हाल आफ्ना परिवारसँगको पहुँचभन्दा हजारौं किलोमिटर टाढा बन्दीगृहमा राखिएका छन् ।
हिमाली हावाको स्पर्शसँगै हुर्किएका कश्मिरीहरु उत्तर प्रदेशको आगरास्थित केन्द्रीय कारागार लगायतका अति गर्मी र आद्र्र ठाउँका बन्दीगृहमा निकै कष्टकर जीवन बिताइरहेका छन् । कश्मीरको औसत तापक्रमको तुलनामा आगरामा तापक्रम डबल नै हुन्छ ।
घरैबाट गिरफ्तार गरी बेपत्ता पारिएको हप्तौंपछि पाएको सूचनाका आधारमा अभिभावकहरु युपीका विभिन्न जेलहरुमा आफन्तको खोजीमा दौडधूप गरिरहेका छन् । जेलमा केही मिनेट मात्र भेट हुन र कुराकानी गर्न पाएपछि अल्लाहलाई धन्यवाद दिंदै बूढा बाबाआमा घर फर्कने गरेका छन् ।
अरु कतिपय त आफन्तका खोजीमा अझैं भौतारिइरहेका छन् । भारत सरकारले गिरफ्तार गरिएकाहरुको स्थिति अझैं सार्वजनिक गरिसकेको छैन । कश्मिरी नागरिक आफ्नै भूमिमा संकटकाल बेहोरिरहेका छन् भने गिरफ्तार गरिएकाहरु अझै बेपत्ताको अवस्थामा छन् ।
भारतीय जनता पार्टी नेतृत्वको सरकारले कश्मीरको विशेष संवैधानिक अधिकार हनन् गर्नुपूर्व कश्मिर क्षेत्रलाई पूरै सैनिक तथा प्राविधिक लगायत आपूर्तिका हिसावले घेराबन्दी गरेको थियो । मोबाइल फोन, सामाजिक सञ्जाल, ल्याण्ड लाइन, इन्टरनेटलगायतका सूचनाप्रविधि ठप्प पारिएका थिए ।
