काठमाडौं । हुम्लाको सदरमुकाम सिमीकोट दशैंअगावै राष्ट्रिय सडक सञ्जालमा जोडिने भएको छ। दशैंअघि ट्र्याक निर्माण सम्पन्न भएसँगै सिमीकोट राष्ट्रिय सडक सञ्जालले जोडिने भएको हो। हुम्लाको सदरमुकाम सिमीकोटबाहेक अधिकांश सदरमुकाम राष्ट्रिय सडक सञ्जालले जोडिइसकेको छ। हुम्लाको हिल्सादेखि सदरमुकाम सिमीकोटसम्मको ९५ किलोमिटर दूरीको सडकको ट्र्याक खोल्ने काम दशैंअघि नै सकिने हिल्सा–सिमीकोट सडक योजनाले जनाएको छ।
आयोजना प्रमुख शशांक मिश्रले हिल्सादेखि सिमीकोट सडक छिचोल्न १५ मिटर मात्रै भएकाले दशैंअघि जोड्न सम्भव हुने बताए । ‘दशैंअघि नै सदरमुकाम सिमीकोट राष्ट्रिय सडक सञ्जालमा जोडिन्छ। १५ मिटर मात्रै सडक खन्न बाँकी रहेको छ।’ –योजना प्रमुख मिश्रले भने ।
उनका अनुसार एक वर्षअघि नै सडक सञ्जाल जोडिनुपथ्र्यो । निकै कडा चट्टान भएको र विस्फोटक पदार्थ अभावका कारण काममा ढिलाइ भइरहेको उनले जानकारी दिए। आव २०६९/७० बाट योजना शुरू भए पनि ०७२ वैशाखमा मात्र नेपाली सेनाबाट ३ टन विस्फोटक पदार्थ दिने स्वीकृति भएको थियो तर उपलब्ध भएन।
स्वीकृति पाएको ३ वर्षपछि ०७५ वैशाखमा सेनाबाट विस्फोटक पदार्थ योजनाले पाएर भदौको पहिलो सातादेखि विस्फोट गर्दै सडकको ट्र्याक खोल्ने काम भइरहेको छ। योजनाले सडकको ट्र्याक खोल्ने कामलाई नै पहिलो प्राथमिकतामा राखेर काम गरिरहेको योजना प्रमुख मिश्रले बताए । ‘योजनाको पहिलो प्राथमिकता भनेको सडकको नयाँ ट्र्याक खोल्ने नै हो। त्यसैअनुसार काम भइरहेको छ।’ –उनले भने । समाचार नेपाल समाचारपत्र दैनिकबाट
