काठमाडौँ। परराष्ट्रमन्त्री शिशिर खनालले नेपालको अन्तर्राष्ट्रिय पहुँच विस्तार र आर्थिक कुटनीतिलाई मजबुत बनाउन अवैतनिक वाणिज्यदुतहरूको भुमिका महत्वपूर्ण हुने बताउनुभएको छ ।
काठमाडौंमा मानार्थ वाणिज्यदूत कोर–नेपालको १९औँ वार्षिक साधारणसभा तथा चार्टर दिवसका अवसरमा आयोजित कार्यक्रमलाई सम्बोधन गर्दै मन्त्री खनालले नेपाल र सम्बन्धित मुलुकहरूबीचको सम्बन्ध सेतुका रूपमा कार्य गर्न उनीहरूलाई आग्रह गर्नुभएको हो । मन्त्री खनालले खासगरी नेपालमा आवासीय कुटनीतिक नियोगहरू नभएका मुलुकहरूसँगको व्यावसायिक, सांस्कृतिक र संस्थागत सम्बन्ध विस्तारमा अवैतनिक वाणिज्यदुतहरूले पु¥याएको योगदानको प्रशंसा गर्नुभयो ।
उहाँले वाणिज्यदुतहरूलाई नेपालको राष्ट्रिय प्राथमिकता र आकाङ्क्क्षाहरूसँग एकाकार हुँदै द्विपक्षीय साझेदारी सुदृढ तुल्याउन सुझाव दिनुभयो । परराष्ट्रमन्त्री खनालले अवैतनिक वाणिज्यदुतहरूको कार्यसम्पादनलाई थप प्रभावकारी र सहज बनाउन विद्यमान नियमावली, सुविधा र कानुनी ढाँचाहरूको समयसापेक्ष परिमार्जन गर्न मन्त्रालय प्रतिवद्ध रहेको स्पष्ट पार्नुभयो ।
नेपालको वर्तमान राजनीतिक अवस्थाबारे चर्चा गर्दै मन्त्री खनालले युवा पुस्ताको आकाङ्क्क्षा र जनमतबाट प्राप्त वर्तमान सरकारको म्यान्डेट सुशासन र समावेशी आर्थिक वृद्धिमा केन्द्रित रहेको उल्लेख गर्नुभयो ।
उहाँले भन्नुभयो, ‘परराष्ट्र मन्त्रालय र अन्य सम्बद्ध निकायहरू नेपालको आर्थिक कूटनीति अघि बढाउन र आर्थिक साझेदारीलाई गहिरो बनाउन तपाईंहरूसँग निकट रहेर सहकार्य गर्न उत्सुक छन् । हाम्रो प्राथमिकता भ्रष्टाचार निर्मूल गर्दै पारदर्शी र उत्तरदायी शासन व्यवस्था कायम गर्नु हो । सरकारको पहिलो वर्ष कानुनी र संस्थागत सुधारमा केन्द्रित हुनेछ ।’
मन्त्री खनालले नेपालको परराष्ट्र नीतिले अब आर्थिक रूपान्तरण, लगानी आकर्षण, व्यापार विस्तार र नवप्रवर्तनलाई प्राथमिकता दिने बताउनु भयो । मन्त्री खनालले विश्वव्यापी भू–राजनीतिक र प्राविधिक परिवर्तनको समयमा अवैतनिक वाणिज्यदुतहरूको अन्तर्दृष्टि र संलग्नता थप मूल्यवान हुने विश्वास व्यक्त गर्नुभयो ।
उहाँले अन्तर्राष्ट्रिय कानून र घरेलु कानूनी ढाँचाको परिधिभित्र रही उच्च व्यावसायिकता र निष्ठाका साथ आफ्नो जिम्मेवारी निभाउन वाणिज्यदुतहरूलाई आह्वान समेत गर्नुभयो ।–न्युज एजेन्सी नेपाल
