काठमाडौं । नेकपा एमालेका उपाध्यक्ष तथा पूर्वअर्थमन्त्री विष्णु पौडेलको हिरासत अवधि थप तीन दिनका लागि लम्ब्याइएको छ। यससँगै उनीमाथिको अनुसन्धानका लागि पाँचौँ पटक म्याद थप भएको हो।
विशेष अदालतका न्यायाधीशद्वय नारायणप्रसाद पौडेल र उमेश कोइरालाको संयुक्त इजलासले सोमबार थप तीन दिनको म्याद दिएको हो।
सम्पत्ति शुद्धीकरणसम्बन्धी अनुसन्धानका क्रममा असार ८ गते सुर्खेतबाट पक्राउ परेका पौडेलको म्याद यसअघि असार ९ गते सात दिन, १५ गते तीन दिन, १८ गते छ दिन र २४ गते पाँच दिनका लागि थप गरिएको थियो।
यसैबीच, पौडेलकी पत्नीले उनको रिहाइको माग गर्दै सर्वोच्च अदालतमा दायर गरेको रिट निवेदन भने अदालतले खारेज गरेको छ।
