काठमाडौँ । नेपाल कम्युनिस्ट पार्टी (नेकपा) का नेता वर्षमान पुनले मुगुका २५ वर्षीय गणेश नेपालीको आत्मदाहपछि काठमाडौं महानगरपालिकाका प्रमुख बालेन्द्र (बालेन) शाहको पुरानो अभिव्यक्ति स्मरण गराउँदै संसद्मा प्रश्न उठाउनुभएको छ ।
प्रतिनिधिसभा बैठकमा बोल्दै नेता पुनले २०७९ माघ १० गते संसद् भवन अगाडि आत्मदाह गरेका प्रेम आचार्यको घटनापछि बालेन शाहले सामाजिक सञ्जालमा लेखेको स्टाटस उद्धृत गर्दै अहिले पनि त्यही धारणा कायम छ कि छैन भनेर प्रश्न गर्नुभयो ।
त्यसबेला बालेनले ‘एकजना नागरिक आफूले देखेको प्रगतिको चाहनाका लागि सक्ने सबै कर्म गर्छन् । एकजना नागरिक आफूले चिनेको वा जानेको सबैलाई आफ्नो विगत र आगत वर्णन गरेर आत्महत्या गर्न लागेको खबर गर्छन् । एकजना नागरिक संसद् भवनको अगाडि आफूमाथि पेट्रोल खन्याएर निराशा पोख्छन् । त्यो निराशाका कारण र धेरै संकेतहरू होलान्, तर सबैभन्दा ठूलो कारण राज्य हो । र, सबैभन्दा भयानक संकेत राज्यको चरम असफलताको हो’ भन्दै सामाजिक सञ्जालमा लेख्नुभएको थियो ।
उक्त अभिव्यक्ति उद्धृत गर्दै पुनले अहिले गणेश नेपालीको घटनालाई लिएर पनि बालेनको बुझाइ उस्तै रहेको हो वा होइन भन्ने प्रश्न गर्नुभयो ।
मुगुको सोरु गाउँपालिका–१ घर भएका २५ वर्षीय गणेश नेपालीले बिहीबार त्रिपुरेश्वरस्थित राहदानी विभाग अगाडि आफ्नै शरीरमा पेट्रोल छर्केर आत्मदाहको प्रयास गरेका थिए । करिब ५५ प्रतिशत शरीर जलेका उनको वीर अस्पतालको बर्न सेन्टरमा उपचारका क्रममा शुक्रबार निधन भएको हो ।
भक्तपुरमा श्रीमती र छोरीसँग बस्दै आएका नेपाली राइड सेयरिङ एपमार्फत राइडरका रूपमा काम गर्दै आएका थिए । आफूले पार्किङमा राखेको मोटरसाइकल महानगर प्रहरीले ह्विल लक लगाएर लैजान खोजेपछि उनले आत्मदाहको प्रयास गरेको प्रारम्भिक विवरण सार्वजनिक भएको छ ।
यस घटनालाई लिएर प्रतिनिधिसभामा अन्य विपक्षी दलका सांसदहरूले पनि सरकारको ध्यानाकर्षण गराउँदै घटनाको निष्पक्ष छानबिन, जिम्मेवारी निर्धारण तथा यस्ता घटना दोहोरिन नदिन आवश्यक कदम चाल्न सरकारसँग माग गरेका छन्।
