काठमाडौं । नेकपा कम्युनिस्ट पार्टीका नेता नारायणकाजी श्रेष्ठले पुनर्वासको उचित व्यवस्था नगरी होल्डिङ सेन्टरमा रहेका सुकुम्बासीलाई बलजफ्ती हटाउने प्रयास नगर्न सरकारलाई आग्रह गरेका छन्।
सामाजिक सञ्जालमार्फत आफ्नो धारणा सार्वजनिक गर्दै उनले नेपाली सेना सहितको सुरक्षा फौज प्रयोग गरेर बलप्रयोगका माध्यमबाट सुकुम्बासीलाई विस्थापित गरी पुनर्वास नभएसम्मका लागि विभिन्न होल्डिङ सेन्टरमा राखिएको स्मरण गराएका छन्।
श्रेष्ठले अहिले पुनर्वासको कुनै ठोस व्यवस्था नगरी ती होल्डिङ सेन्टरबाट सुकुम्बासीलाई निकाल्ने सूचना, धम्की र चेतावनी दिइनु नितान्त गलत र गैरजिम्मेवार कदम भएको बताएका छन्।
उनले सुकुम्बासीका लागि वैज्ञानिक, मानवीय र दीर्घकालीन बसोबासको व्यवस्था यथाशीघ्र गर्न सरकारसँग माग गर्दै त्यस्तो व्यवस्था नभएसम्म होल्डिङ सेन्टरबाट बलजफ्ती हटाउने कार्य तत्काल रोक्न आग्रह गरेका छन्। यस्तो कार्य जारी रहे त्यसको परिणाम गम्भीर हुन सक्ने चेतावनी पनि श्रेष्ठले दिएका छन्।
