काठमाडौँ । स्वदेशी उत्पादनलाई राष्ट्रिय गौरवका रूपमा प्रवर्द्धन गर्ने उद्देश्यसहित सरकारले विशेष पहल थालेको छ । मन्त्रिपरिषद्को आजको बैठकमा सरकारी स्वामित्वमा रहेको दुग्ध विकास संस्थान (डीडीसी) का उत्पादनहरूको देशव्यापी प्रवर्द्धन तथा बजार विस्तारका विषयमा विस्तृत छलफल भएको छ ।
कृषि, वन तथा पर्यावरण मन्त्री गीता चौधरीले बैठकमा डीडीसीका उत्पादनहरूको प्रवर्द्धनसम्बन्धी एजेन्डा मुख्य रूपमा उठाउनुभएको हो । उहाँले स्वदेशी दुग्ध उत्पादनको संरक्षण, किसानको हित प्रवर्द्धन तथा संस्थानको व्यावसायिक सुदृढीकरणका लागि डीडीसीका उत्पादनहरूको प्रयोग र प्रवर्द्धनलाई प्राथमिकता दिनुपर्नेमा जोड दिनुभयो ।
मन्त्री चौधरीले डीडीसीलाई थप प्रतिस्पर्धी, गुणस्तरीय र आत्मनिर्भर संस्थाका रूपमा विकास गर्न सरकारका विभिन्न निकायबीच प्रभावकारी समन्वय आवश्यक रहेको उल्लेख गर्नुभयो । साथै, नेपाली दुग्ध किसानबाट सङ्कलित दूधको उचित व्यवस्थापन र उत्पादनको बजार सुनिश्चित गर्न सरकारी तहबाट आवश्यक सहयोग हुनुपर्नेमा उहाँको जोड थियो ।
त्यसैक्रममा उहाँले प्रधानमन्त्री बालेन्द्र शाहसहित मन्त्रिपरिषद्का सदस्यहरूलाई डीडीसीका उत्पादनहरूको प्याकेज वितरण गर्नुभएको थियो ।
लामो समयदेखि नेपाली उपभोक्तामाझ शुद्ध र गुणस्तरीय दूध, घिउ, दही, पनिर, चिजलगायतका दुग्धजन्य उत्पादन उपलब्ध गराउँदै आएको डीडीसीको प्रवर्द्धन अभियानलाई थप ऊर्जा दिने अपेक्षा गरिएको छ । प्रधानमन्त्री शाहले समेत डीडीसीका उत्पादनको प्रवर्द्धन तथा प्रचारमा सहभागी हुँदै स्वदेशी वस्तुको उपभोग बढाउने सन्देश दिनुभएको छ ।
