काठमाडौं, २० जेठ । राष्ट्रिय स्वतन्त्र पार्टी (रास्वपा) का सभापति रवि लामिछानेले भारत भ्रमणका क्रममा भारतीय प्रधानमन्त्री नरेन्द्र मोदीसँग भेटवार्ता गरेका छन्। भेटमा दुईपक्षीय हित, आपसी सहकार्य तथा विविध समसामयिक विषयमा छलफल भएको बताइएको छ।
सोमबारदेखि सुरु भएको पाँच दिने भारत भ्रमणका क्रममा लामिछाने नेतृत्वको प्रतिनिधिमण्डललाई भारतीय जनता पार्टी (भारतीय जनता पार्टी) को कार्यालयमा भव्य स्वागत गरिएको थियो। पार्टीका अध्यक्ष नितिन नवीनले उनीसहितको टोलीलाई स्वागत गरेका थिए।
भ्रमणका क्रममा मंगलबार लामिछानेले भारतका विदेशमन्त्री एस. जयशंकर तथा गृहमन्त्री अमित शाहसँग पनि छुट्टाछुट्टै भेटवार्ता गरेका थिए। ती भेटघाटहरूमा नेपाल–भारत सम्बन्ध, विकास सहकार्य तथा आपसी चासोका विषयहरूमा छलफल भएको जनाइएको छ।
रास्वपा सभापति लामिछाने नेतृत्वको प्रतिनिधिमण्डल भाजपाको निमन्त्रणामा जेठ १८ गते भारत प्रस्थान गरेको हो। प्रतिनिधिमण्डलमा उनकी पत्नी निकिता पौडेल, रास्वपाका सहमहामन्त्री तथा प्रतिनिधिसभा सदस्य विपीनकुमार आचार्य, सचिवालय सदस्य तथा प्रतिनिधिसभा सदस्य दीपक बोहरा र स्वकीय सचिव प्रदीप आचार्य सहभागी छन्।
भ्रमणलाई राजनीतिक तथा कूटनीतिक दृष्टिले महत्त्वपूर्ण रूपमा हेरिएको छ भने आगामी दिनमा यसले दुई देशबीचको पार्टीगत र संस्थागत सम्बन्धमा थप प्रभाव पार्न सक्ने अनुमान गरिएको छ।
