काठमाडाैँ । प्रतिनिधि सभामा आगामी आर्थिक वर्षको नीति तथा कार्यक्रममाथि छलफल सुरु हुनुअघि नै विपक्षी सांसदहरूले प्रधानमन्त्री बालेन शाहको अनुपस्थितिलाई लिएर आपत्ति जनाएका छन् । उनीहरूले प्रधानमन्त्रीको राजीनामा समेत माग गर्दै संसद्मा अवरोध गरेका छन् ।
आगामी आर्थिक वर्षको नीति तथा कार्यक्रममाथि आजदेखि छलफल सुरु गर्ने कार्यसूची तय गरिएको थियो । तर छलफलका क्रममा प्रधानमन्त्रीले दिनुपर्ने जवाफ अर्थमन्त्री डा. स्वर्णिम वाग्लेले प्रस्तुत गर्ने भएपछि विपक्षी सांसदहरू आक्रोशित बनेका हुन् ।
संसद् बैठकमा प्रधानमन्त्रीको अनुपस्थितिलाई लिएर विपक्षी दलका सांसदहरूले विरोध जनाउँदै उहाँको खोजी गरेका छन् । उनीहरूले नीति तथा कार्यक्रम जस्तो महत्वपूर्ण विषयमा प्रधानमन्त्री स्वयं उपस्थित हुनुपर्ने भन्दै असन्तुष्टि व्यक्त गरेका छन् ।
विपक्षीको नाराबाजी र अवरोधका कारण बैठक केही समय प्रभावित बनेको छ । यसबीच संसद् परिसरमा तनावपूर्ण अवस्था देखिएको छ भने कार्यसूचीअनुसार छलफल अघि बढाउने वा स्थगित गर्ने विषयमा अन्योल सिर्जना भएको छ ।
