काठमाडाैैँ । बागमती प्रदेशका मुख्यमन्त्री इन्द्रबहादुर बानियाँले सम्पत्ति शुद्धीकरण अनुसन्धान विभागले आफ्नो निवास र कार्यालयमा गरेको छापा प्रति आपत्ति जनाउनुभएको छ। सोमबार जारी गरेको प्रेस विज्ञप्तिमा मुख्यमन्त्री बानियाँले उक्त घटनाले आफ्नो व्यक्तिगत तथा सामाजिक चरित्रमाथि आघात पुगेको महसुस भएको बताउनुभएको छ।
विज्ञप्तिमा मुख्यमन्त्री बानियाँले आफू लामो राजनीतिक यात्रापछि अहिले जनताको सेवकको रूपमा मुख्यमन्त्री पदमा रहेको उल्लेख गर्दै आफ्नो प्राथमिकता सुशासन, पारदर्शिता र भ्रष्टाचारमुक्त समाज निर्माण रहेको दाबी गर्नुभएको छ। उहाँले प्रदेश सरकारमार्फत सार्वजनिक खर्चमा मितव्ययिता अपनाउँदै विकास योजना तथा कार्यक्रमहरूलाई आवश्यकता र औचित्यका आधारमा अघि बढाइएको पनि स्पष्ट पार्नुभएको छ।
मुख्यमन्त्री बानियाँले संघीय संरचना अन्तर्गत तीन तहका सरकारबीच समन्वय, सहअस्तित्व र सहकार्य आवश्यक रहेको उल्लेख गर्दै संघीय सरकारको सकारात्मक कार्यमा प्रदेश सरकार सधैं साथमा रहने प्रतिबद्धता व्यक्त गर्नुभएको छ। साथै, राज्यका जुनसुकै निकायले गर्ने सुशासनसम्बन्धी छानबिनमा आफ्नो पूर्ण सहयोग रहने पनि उहाँले स्पष्ट पार्नुभएको छ।
उहाँले सम्पत्ति शुद्धीकरण अनुसन्धान विभागको नाममा गरिएको छापामारी आकस्मिक रूपमा भएको भन्दै आपत्ति जनाउनुभएको छ। तर, अनुसन्धान प्रक्रियाप्रति भने आफूले समर्थन गर्ने बताउँदै सञ्चार माध्यममा आएका समाचारका कारण सर्वसाधारण भ्रमित नहुन आग्रह गर्नुभएको छ।
